A Coruña acolleu esta fin de semana a décimo sexta edición da Copa Princesa, que se celebrou por primeira vez na cidade. No torneo, que mide aos seis mellores conxuntos da Superliga Feminina 2 de voleibol, participaron os equipos MCR Premià de Dalt, Melilla Sport Capital, o Club Voleibol Barcelona, Cartagena Algar e Extremadura Arroyo xunto co CV Zalaeta, o único conxunto deportivo galego.

O Barça CVB foi o gañador da Copa Princesa 2023, logo dunha victoria 3-1 contra o Melilla Sport Capital. A concelleira de Mercados e Barrios, Diana Sobral Cabanas, fíxolles entrega das medallas ás xogadoras dos catro equipos, xunto con Estrella Pérez, directora do IES Zalaeta; Nicolau Santos, presidente do CV Zalaeta; Diego Calvo, vicepresidente segundo e conselleiro de Presidencia, Xustiza e Deportes; José Ángel Luna, Presidente da Federación Galega de Voleibol; e Agustín Marín, presidente da Federación Española de Voleibol. A edil entregoulle o trofeo de subcampioas á capitana do Melilla Sport Capital, Almudena Martín, e deulles os parabéns ás xogadoras pola competición.

Antes da final, o Cartagena-Algar Surmenor e Extremadura Arroyo loitaron polo 3º e 4º postos nunha axustada competición. O equipo andaluz gañou ao conxunto extremeño no quinto set 3-2, acadando o bronce desta Copa Princesa 2023. Meriyen Serrano, central do Barça CVB, foi galardoada como mellor xogadora (MVP) do torneo.