O ciclo internacional de poesía Poetas Di(n)versos, dirixido por Yolanda Castaño e impulsado polo Concello da Coruña, iniciará o vindeiro luns 5 de outubro a programación do primeiro trimestre da súa edición número 18 cun cartel que reunirá na cidade autoras e autores de Polonia, Colombia e Italia xunto a destacadas voces da poesía galega contemporánea.

As sesións celebraranse ás 20.00 horas no auditorio do Centro Sociocultural Ágora, con entrada gratuíta ata completar a capacidade. Ao longo dos próximos tres meses, o público poderá asistir a tres encontros poéticos que combinarán a participación de creadoras e creadores internacionais con representantes da poesía galega actual, un dos sinais de identidade do ciclo dende a súa creación.

O concelleiro de Cultura e Turismo, Gonzalo Castro, destacou que "Poetas Di(n)versos é unha das iniciativas literarias máis prestixiosas da programación cultural da cidade e un exemplo do compromiso do Goberno de Inés Rey coa internacionalización da cultura e co apoio á creación poética galega". O edil lembrou que o ciclo "converte cada trimestre A Coruña nun punto de encontro para algunhas das voces máis relevantes da poesía mundial, ao tempo que ofrece unha plataforma de gran visibilidade para autoras e autores do noso país".

A programación arrancará o 5 de outubro cun encontro entre a poeta e narradora naronesa Ana Varela Miño e a autora polaca Krystyna Dąbrowska. Ambas, pertencentes á mesma xeración, achegarán dúas miradas poéticas que parten da experiencia cotiá para explorar cuestións universais como a memoria, a identidade ou a permanencia. Varela Miño, gañadora dos premios Francisco Añón e Gonzalo López Abente, é autora dos poemarios 'Asombrario' e 'Onde nacen as hedras', ademais da novela 'Runrún'. Pola súa banda, Dąbrowska é unha das voces máis recoñecidas da poesía polaca contemporánea, distinguida cos premios Wisława Szymborska, Kościelski e o Premio Literario da Cidade de Varsovia, cunha obra traducida a máis de vinte linguas.

Sesións en novembro e decembro

O segundo encontro terá lugar o 23 de novembro e reunirá a poeta colombiana Lauren Mendinueta e o escritor lucense Xosé Miranda. A sesión xirará arredor da memoria, a identidade e a persistencia da paisaxe e dos territorios desaparecidos, a través de dúas traxectorias literarias de gran relevancia no ámbito hispanoamericano e galego. Mendinueta está considerada unha das voces máis destacadas da poesía hispanoamericana contemporánea e desenvolveu unha importante carreira literaria entre Colombia, España e Portugal. Xunto a ela participará Xosé Miranda, poeta, narrador e ensaísta cunha ampla traxectoria recoñecida con galardóns como os premios Xerais, García Barros, Merlín, Esquío ou Afundación.

O trimestre pecharase o 14 de decembro cun diálogo poético entre o italiano Loretto Rafanelli e a poeta e artista plástica Ánxeles Penas. O encontro permitirá achegarlle ao público dúas voces de longa traxectoria que reflexionan na súa obra sobre o paso do tempo, a memoria, a paisaxe e o silencio. Rafanelli desenvolveu unha destacada carreira como autor, editor e promotor cultural en Italia, mentres que Ánxeles Penas é unha das figuras históricas da poesía galega contemporánea, cunha obra recoñecida con numerosos premios e publicada tamén noutras linguas.

Poetas Di(n)versos está dirixido pola Premio Nacional de Poesía Yolanda Castaño e constitúe unha das iniciativas máis consolidadas da programación cultural municipal, combinando desde hai anos a participación de autoras e autores internacionais de referencia co impulso á creación poética galega contemporánea.