O Concello avanza co plan de actuacións de mellora previsto na Cidade Vella, onde a inicios desta semana comezaron as tarefas para reordenar a circulación entre a Mestranza e a avenida do Metrosidero, unha medida consensuada previamente coa veciñanza dos bloques residenciais da contorna.

A medida máis destacada será a modificación do tránsito no carril que conecta a avenida do Metrosidero coa rúa da Mestranza, que bordea a Residencia Militar Atocha-Mestranza e actualmente está configurada en sentido de incorporación á rúa Mestranza.

Agora, pasará a estar disposta á inversa: con incorporación desde a rúa Mestranza en dirección á avenida do Metrosidero, facilitando así as maniobras dos vehículos á hora de buscar estacionamento nesta parte do barrio, mais contribuíndo tamén á redución do tránsito na rúa Campo da Estrada, que desemboca nunha praza coa circulación habilitada a velocidade reducida, mais cunha clara preferencia peonil. De aí que esta actuación tamén se formulase como unha opción para propiciar o reforzo da seguridade viaria na praza.

Os traballos correspondentes á sinalización deste cambio de sentido lévanse a cabo en paralelo ao repintado das prazas de estacionamento para persoas residentes, que tamén se está a executar estes días, dando continuidade ao plan progresivo de actuacións de sinalización horizontal que se está a abordar desde hai semanas na cidade antes da Cidade Vella, en barrios como Monte Alto.