O Concello da Coruña porá en marcha, a partir do 14 de novembro, unha nova tempada dos Bailes de Maiores, unha proposta municipal que forma parte do programa de envellecemento activo e que busca favorecer a participación comunitaria, a socialización e o benestar físico e emocional das persoas maiores, a través dun modelo de lecer accesible e próximo.

As sesións desenvolveranse en horario de 17.00 a 20.30 h e contarán cun prezo simbólico de 1,50 € por persoa, co fin de facilitar a participación e a rotación de asistentes ao longo da semana. O Concello achegará os medios técnicos e musicais necesarios para garantir o correcto desenvolvemento dos encontros.

A alcaldesa, Inés Rey, destacou que "con estes bailes reforzamos o envellecemento activo, loitamos contra a soidade non desexada e creamos espazos de encontro accesibles e próximos á veciñanza, nos que a música e o baile melloran a saúde e a calidade de vida".

A programación será rotatoria entre diferentes centros cívicos municipais e poderá adaptarse por necesidades organizativas, o que se comunicará con antelación polos canais oficiais. Cada sesión contará con persoal de apoio e animación musical, co obxectivo de ofrecer unha experiencia diversa e enriquecedora.

A posta en marcha deste programa enmárcase na aposta decidida pola mellora da calidade de vida das persoas maiores e pola dinamización da rede de centros cívicos, unha liña de traballo que se reforza neste mandato baixo a planificación e impulso do Goberno municipal.

Programación prevista por días e centros

• Venres, 14 de novembro | Centro Cívico Os Mallos | 17.00-20.30 h
• Sábado, 15 de novembro | Centro Cívico San Diego | 17.00-20.30 h
• Domingo, 16 de novembro | Centro Cívico Monte Alto | 17.00-20.30 h
• Luns, 17 de novembro | Centro Cívico Monelos | 17.00-20.30 h
• Mércores, 19 de novembro | Centro Participativo O Birloque | Semanas alternas | 17.00-20.30 h
• Xoves, 20 de novembro | Centro Cívico Castrillón / Centro Cívico Eirís | Semanas alternas (inicia en Castrillón) | 17.00-20.30 h

O Concello anima á veciñanza maior a participar activamente e a consultar as actualizacións de datas e localizacións nos taboleiros dos centros e nos perfís municipais. A organización contará con todos os recursos necesarios para asegurar o bo funcionamento das sesións e unha experiencia agradable para as persoas usuarias.