O concelleiro de Cultura e Turismo e responsable municipal de Memoria Democrática, Gonzalo Castro, mantivo unha xuntanza de traballo co secretario de Estado para a Memoria Democrática, Fernando Martínez López, na que se avanzou en diferentes cuestións de relevancia para a cidade. "O Goberno de Inés Rey realiza un traballo constante para restablecer a memoria de aquelas persoas que sufriron a represión fascista na nosa cidade, dándolle voz e espazos co obxectivo de achegar a súa mensaxe á cidadanía", indicou Castro, que celebrou o bo ambiente da reunión.

Castro e Martínez López avanzaron na tramitación da declaración dos Lugares de Memoria Democrática da Coruña: Casa Cornide, Casa Museo Casares Quiroga e o espazo comprendido entre a Torre de Hércules, Punta Herminia e Campo da Rata. Segundo recolle o Goberno, un Lugar de Memoria Democrática é aquel espazo, inmoble, paraxe ou patrimonio cultural inmaterial ou intanxible no que se desenvolveron feitos de singular relevancia pola súa significación histórica, simbólica ou pola súa repercusión na memoria colectiva, vinculados á memoria democrática, a loita da cidadanía española polos seus dereitos e liberdades, a memoria das mulleres, así como coa represión e violencia sobre a poboación como consecuencia da resistencia ao golpe de estado de xullo de 1936, a Guerra, a Ditadura, o exilio e a loita pola recuperación e profundización dos valores democráticos.

Por outra banda, tamén se analizou a aplicación da Lei de Memoria Democrática na Coruña e se acordou a realización dunha homenaxe pública en María Pita ás persoas empregadas municipais represaliadas pola ditadura franquista. Segundo un estudo realizado polo Instituto Cornide, serían máis de 140 persoas as que sufriron dita represión.