A concelleira de Igualdade e Diversidade, Rocía Fraga, condenou na mañá deste luns os dous últimos asasinatos machistas, perpetrados esta fin de semana en Badalona e Torre Pacheco (Murcia), e, igualmente, amosou a súa repulsa polo atentado homófobo que tivo lugar en Orlando (EUA).

O Concello convocou esta mañá un minuto de silencio en sinal de respecto e recordo das vítimas e en solidariedade coas familias e persoas achegadas, e está previsto que durante o Pleno municipal desta tarde a Corporación tamén faga mención á traxedia.

A concelleira Fraga destacou a importancia de condenar de forma unánime tanto os asasinatos machistas como a matanza de Estados Unidos e a necesidade "de facer causa común". "É necesario acabar con todas as violencias machistas, cos feminicidios e cos asasinatos homófobos ou por condición de diversidade sexual non heteronormativa", indicou a responsable de Igualdade e Diversidade, que chama ao Goberno central que saia da próxima convocatoria electoral a facer disto "unha cuestión de Estado".