O Concello da Coruña sacou a contratación un servizo de xestión das colonias felinas urbanas mediante un software que permita controlar de modo eficaz as poboacións destes animais na cidade, para garantir o seu benestar e minimizar posibles problemas de limpeza urbana e molestias á cidadanía, seguindo coa liña de actuación na materia marcada polo Goberno de Inés Rey.

A necesidade do contrato nace da obriga, imposta pola Lei de protección dos dereitos e o benestar dos animais, de que os concellos sexan os que xestionen as colonias felinas de cada municipio e apliquen o método CER (Captura, Esterilización e Retorno) para controlar a poboación de gatos comunitarios.

O software do novo contrato, cun orzamento de 25.000 euros e unha duración de tres anos, deberá incluír un mapa interactivo que permita visualizar o estado xeral das colonias felinas e a súa xeolocalización. Así mesmo, o programa permitirá clasificar as colonias, obter información de cada exemplar a través dos microchips e xestionar as queixas e incidencias que poidan xurdir.

Os dous eixos fundamentais do programa serán, por unha banda, o seguimento detallado do protocolo CER e, por outra, a xestión das persoas colaboradoras na xestión das colonias, distinguindo entre asociacións, persoal veterinario asignado e persoas alimentadoras. Neste último caso, será posible especificar se recibiron formación, así como se se obtivo autorización municipal.

"Esta nova ferramenta de xestión facilitará o control do censo de gatos na cidade mantendo ao día a ficha de cada colonia, especificando o número exacto de gatos, o seu estado de saúde, vacinación, esterilización e o chip de identificación", sinala a concelleira de Medio Ambiente, Yoya Neira, quen tamén destacou que o novo programa permitirá "que as asociacións e as persoas coidadoras lles poidan notificar rapidamente incidencias sobre limpeza, saúde dos animais ou conflitos veciñais directamente aos equipos municipais".