A concelleira de Xustiza Social e Coidados, Silvia Cameán, avanza que o centro de atención de baixa esixencia destinado a dar cobertura a todas aquelas persoas que se atopan sen fogar e, de xeito especial, ás que presentan unha situación de maior desarraigo social, comezará a funcionar nas próximas semanas, dentro dos prazos previstos, unha vez que veñen de ser rematadas as obras de acondicionamento do local municipal no que se ubicará, en Monte Alto. Por outro lado, a responsable municipal indica que o contrato para a xestión deste servizo está en fase de adxudicación, e será resolto nun breve período de tempo. "Tendo en conta todo isto, a nosa previsión é poder comezar a ofrecer este servizo contra o mes de abril, o que entra dentro dos nosos cálculos, que pasaban por telo listo na primavera", comentou. Como recorda, o programa municipal de atención de baixa esixencia para persoas en situación de rúa busca ofrecer unha atención básica nocturna a persoas sen fogar que están en situación de exclusión e marxinación social e que, polas súas características, non poden facer uso doutros recursos para pernoctar.

A responsable municipal destaca que, ademais, este pioneiro servizo de baixa esixencia ten orzamentado no proxecto presupostario deste ano un montante de 257.000 euros. O programa de acollemento nocturno funcionará, tal e como expón, todos os días do ano, desde as 21.00 ata as 08.00 horas, para dar cobertura a 15 persoas, co obxectivo de proporcionar "atención básica ás persoas sen fogar, para facilitarlles un espazo nocturno digno, seguro e confortable", como complemento ao resto de accións que o Concello dirixe a este colectivo. Nel se ofrecerá servizo de acollida para información, orientación, promoción e inserción social, ademais de servizo de estancia e lecer, café, limpeza e consigna. Como indica a titular de Xustiza Social, o persoal traballará tanto no albergue como na rúa coas persoas usuarias do programa, que se completará con accións de integración que se programan desde outros servizos e equipos da consellería e do Semus (Servizo municipal de urxencias sociais), nunha liña que ten como finalidade o desenvolvemento de actuacións e servizos tendentes á prevención, atención, promoción e inserción social das persoas sen fogar que pasan a noite na rúa, caixeiros ou portais.