O Goberno local vén de trasladar á Xunta de Galicia a súa elección dos festivos locais do ano 2017. Ao coincidir tanto a festividade de San Xoán como a do Día do Rosario en fin de semana, o Concello opta por manter no vindeiro exercicio como xornada festiva o tradicional Martes de Entroido (28 de febreiro) e, como novidade, declararar festivo local a xornada do 8 de marzo (que caerá mércores), Día das Mulleres, como forma de recoñecer o papel decisivo que as mulleres levaron e levan a cabo na formación, desenvolvemento e progreso desta cidade, así como a necesidade de conformar unha sociedade máis xusta, baseada na igualdade de dereitos e oportunidades, tanto para homes como para mulleres.

A celebración da festividade do 8 de marzo virá acompañada da organización de numerosos actos lúdicos e culturais relacionados coa loita e recoñecemento dos dereitos das mulleres, e terá na contorna da Praza da Palloza o epicentro das súas celebracións. O Goberno local rende así homenaxe a todas as mulleres da Coruña, facendo unha mención especial a aquelas que foron peza clave no desenvolvemento histórica da mesma, como as 'cigarreiras', as traballadoras da histórica Fábrica de Tabacos, peza clave do impulso fabril da cidade e tamén do movemento sindicalista e dos dereitos laborais.