A alcaldesa, Inés Rey, e o presidente da Deputación, Valentín González Formoso, asinaron hoxe a extensión, por un período de dous anos, do convenio para a xestión do Teatro Colón. Este novo convenio, que rematará o 31 de decembro de 2027, continúa a senda de colaboración institucional aberta en 2018 para potenciar o uso do espazo e a calidade das súas programacións. En total, a Deputación desembolsará 500.000 euros, 350.000 para gastos de funcionamento do teatro e para programación cultural, e 150.000 para os labores de mantemento. 

A xestión do Colón seguirá recaendo sobre o Instituto Municipal Coruña Espectáculos (IMCE). Ademais, manterase a comisión mixta con representantes de senllas institucións para velar polo cumprimento do convenio. Así, o teatro continuará integrado na rede pública de espazos municipais, que cumpren o servizo público de achegar a cultura á cidadanía e traer á cidade espectáculos, festivais e obras de primeiro nivel. Nos últimos anos, o Colón foi un dos epicentros da vida teatral e musical na Coruña.

A Deputación reservarase 40 días anuais para a celebración de actos institucionais e festivais ou a cesión do espazo a outros Concellos da provincia. "Que este convenio mantéñase é unha boa nova por dous motivos: primeiro porque é a forma máis eficiente de garantir a calidade e a variedade na programación dun dos emblemas culturais desta cidade, e segundo porque evidencia que a colaboración institucional é a mellor senda para facer ben as cousas e obter resultados que os cidadáns poidan gozar", apuntou Inés Rey. A su vez, Formoso destacou que o convenio "reforza a cooperación entre administracións e consolida o Teatro Colón como un referente cultural de primeiro nivel en Galicia".