O Concello está a elaborar un plan de difusión para as rutas patrimoniais polo ámbito da Cidade Vella. Este servizo, que está en proceso de contratación, incluirá a elaboración e deseño dos materiais de dinamización, difusión e comunicación necesarias para a execución das actuacións de activación dos itinerarios culturais e patrimoniais. 

"O centro histórico da cidade supón un dos seus grandes valores e atractivos. É unha viaxe pola historia e pola identidade da Coruña. Por iso estamos a reforzar as accións para dar a coñecer dentro e fora todas as marabillas arquitectónicas, artísticas e culturais destas rúas", subliñou a alcaldesa, Inés Rey.

O financiamento desta acción está incluída como parte do plan desenvolvido cos fondos da subvención concedida ao Concello polo ministerio de Industria e Turismo destinada ao financiamento de proxectos sostibles de mantemento e rehabilitación de Patrimonio Turístico, por un importe total de 2.088.000 euros. 

As accións de promoción e comunicación buscan xerar notoriedade e afinidade, a través de diferentes elementos gráfico-comunicativos, cos usuarios para lograr compromiso activo e un maior grao de coñecemento, ademais de incrementar a visibilidade e relevancia dos itinerarios culturais da Cidade Vella. Ademais, tratarán de mellorar, diversificar e redistribuír a oferta turístico-patrimonial na zona, garantindo experiencias de calidade para todas os visitantes. 

Tamén quere subliñarse a importancia dos itinerarios de temática específica para persoas usuarias con intereses máis concretos (arquitectura, literatura, patrimonio biocultural e xardinería, legado histórico-militar, roteiros enfocados en figuras femininas e percorridos polo legado hebreo na Cidade Vella). Deste forma, sensibilizarase ao público obxectivo sobre os roteiros turísticos alternativos que discorren polo centro histórico.