A alcaldesa, Inés Rey, e o concelleiro de Deportes, Juan Ignacio Borrego, recibiron esta mañá no consistorio á deportista Julia Benedetti, campioa de España de skateboard na modalidade de rampla tras acadar a vitoria nas tres probas puntuables do circuíto nacional que tiveron lugar o pasado mes de maio. Esta coruñesa de 15 anos tamén conseguiu a medalla de bronce nos pasados Xogos Mundiais de Doha, proba na que soamente foi superada polas dúas representantes de Xapón. Benedetti adestra no Club Maroña Indoor, unha escola profesional de skateboard herculina que ten as súas instalación na estrada de Nostián.

A deportista acudiu acompañada de súa nai e seu pai e mais do seu adestrador Iván Maroño á recepción oficial, onde a agasallaron cunha figura dedicada da Torre de Hércules de cerámica de Sargadelos como recoñecemento do Concello da Coruña ao seu gran labor neste deporte.