Mañá xoves, ás 19.00 horas, comezará a cerimonia de descubrimento da placa da Praza das Atochas, até agora denominada Praza de Millán Astray. Con este acto cargado de simbolismo, o Concello da Coruña comeza a aplicar a Lei de Memoria Histórica no rueiro da cidade. O alcalde da Coruña, Xulio Ferreiro, manifestou a intención de facer deste acontecemento “un acto festivo do que poida participar toda a cidadanía”. Amenizado pola Banda Municipal de Música, o rexedor presidirá o evento de descubrimento de placa, acompañado polo concelleiro de Culturas, Deporte e Coñecemento, José Manuel Sande.

Está previsto que durante o acto de descubrimento da Praza das Atochas tamén tomen a palabra Manuel Monge, membro da comisión de expertos do Concello da Coruña que analizou as medidas para dar cumprimento á Lei de Memoria Histórica, e Mariquiña Villaverde, filla de José Villaverde, secretario xeral da CNT en Galicia entre 1931 e 1933 e memoria viva da represión e a dignidade do pobo coruñés.

Ademais de todos os veciños e veciñas da Coruña, a Corporación municipal ao completo está convocada a este acto, a Corporación local de 2009 que aprobou o cambio de denominación, así como os representantes de diversas entidades, asociacións comprometidas coa Memoria Histórica e a comisión de expertos que fixo o informe da mesma.