O concelleiro de Culturas, Deporte e Coñecemento, José Manuel Sande, inaugurou na mañá deste venres a exposición ao aire libre Platea. Los fotógrafos miran al cine, unha escolma de 40 traballos de artistas estatais que poñen en relación ás artes da imaxe. A mostra, que se enmarca na celebración da sétima edición do (S8) Festival de Cinema Periférico, atópase situada na explanada da Mariña, un feito que o responsable municipal quixo destacar durante a presesentación, "ao dotar a un novo espazo da cidade dun uso artístico e cultural". "Falamos dunha nova conquista cultural da rúa e do espazo público a través da arte e  feito creativo, da apertura e accesibilidade ás vangardas fóra dos recintos", sinalou Sande, quen tamén salientou a presenza da obra do coruñés Manuel Vilariño - Premio Nacional de Fotografía - na exhibición e  a "irmandade" que representa esta mostra entre as artes visuais, "que complementa a extensa programación do S8, nunha edición que desexamos sexa fructífera para todas e todos os que se acheguen ás actividades".

O concelleiro estivo acompañado na inauguración polo responsable do (S8), Ángel Rueda, quen salientou a "influencia da fotografía nos cineastas e viceversa", e tamén por Jorge Sobredo, director de programación de Acción Cultural Española, a entidade que organiza esta exposición itinerante. Sobredo destacou o carácter "participativo" desta mostra ao aire libre "para que poida ser disfrutada tanto polo público que asiste aos recintos dos festivais, como aquel que se atopa na rúa durante a celebración do mesmo".

A exposición Platea. Los fotógrafos miran al cine, que poderá visitarse ata o 12 de xullo, chega á cidade da Coruña tras o seu paso polos festivais de cine de San Sebastián, Sevilla, Murcia e Málaga. A comisaria da mostra é a fotografa Blanca Berlín, quen seleccionou traballos de 40 artistas de recoñecida traxectoria tanto a nivel estatal como internacional: Amparo Garrido, Ana Muller, Andreu Catalá Roca, Antonio Lafuente, Antonio Tabernero, Beatriz Moreno, Beatriz Romero, Blanca Berlín, Carlos Pérez Siquier, Castro Prieto, Chema Conesa, Chema Madoz, CiucoGutiérrez, Colita, Cristina de Middel, Cristina García Rodero, Eduardo Momeñe, Encarna Marín, Francesc Catalá Roca, Gabriela Grech, Gerardo Custance, Hélène Bergaz, Joan Fontcuberta, Jordi Socías, Juan Manuel Díaz Burgos, Laura Torrado, Linarejos Moreno, Ma Casanova, Manel Esclusa, Manuel Vilariño, Martí Llorens, Miguel Ángel Mendo, Mikel Bastida, Nicolás Muller, OukaLeele, RamónMasats, RicardTerré, Rosa Muñoz, Rosell Meseguer e Sergio Belinchón.