O Pazo de María Pita acollerá dende mañá, xoves 9 de xuño, e até o 19 do mesmo mes, unha exposición organizada polo Concello e o Centro de Coordinación de Salvamento Marítimo da Coruña que leva por título Helimer Galicia 25 anos. A mostra rende homenaxe ao afamado helicóptero de rescate, que leva un cuarto de século tendo a cidade como base de operacións. Situada na planta baixa do edificio municipal, na sala de exposicións, o evento inaugurarase ás 18.00 horas deste xoves e, posteriormente, poderá visitarse en horario de 12.00 a 14.00 e de 18.00 a 21.00 horas todos os días.

O Concello da Coruña pretende con esta exposición non só celebrar os 25 anos na cidade do helicóptero de rescate, senón tamén render homenaxe aos e ás profesionais que participan e conforman este servizo. De feito, a mostra dá conta dalgunhas das misións nas que participaron un dos equipos de salvamento marítimo mellor considerados de todo o mundo.

A exposición complétase cunha exhibición do material utilizado, dende as lanchas até a equipación e o instrumental do equipo de rescate.