O Teatro Colón acollerá a vindeira semana a comedia '¿Quieres pecar conmigo?', unha das producións teatrais de maior éxito da escena estatal nos últimos anos, avalada por máis de 200.000 espectadores. A obra poderá verse na Coruña entre os días 25 e 27 de setembro, con tres funcións programadas dentro da oferta cultural de outono da cidade. 

"Desde o Goberno de Inés Rey continuamos traballando para que os teatros municipais acollan propostas de gran éxito e calidade, capaces de atraer públicos moi diversos. O Colón consolidouse como un dos principais escenarios escénicos de Galicia e esta produción é un magnífico exemplo do tipo de programación que queremos ofrecer á cidadanía", sinalou Gonzalo Castro.

A obra, escrita por Borja Rabanal e dirixida polo propio autor xunto a Joan Olivé, chega á cidade despois de converterse nun dos grandes fenómenos de billeteira do teatro español. A comedia relata as peripecias de Paz e Mónica, dúas mozas que comparten piso e que, afogadas polas dificultades económicas, poñen en marcha un plan tan desesperado como disparatado para intentar resolver os seus problemas. O resultado é unha sucesión de equívocos, mentiras, situacións inesperadas e humor de ritmo trepidante. 

Castro destacou tamén a importancia de ofrecer propostas que combinen entretemento e capacidade de conexión co público. "O teatro é unha ferramenta fundamental para a vida cultural da cidade e títulos como '¿Quieres pecar conmigo?' permiten achegar ás salas a espectadores habituais e tamén a persoas que se achegan ás artes escénicas por primeira vez", indicou.

As representacións no Teatro Colón forman parte da xira que a produción está a desenvolver por distintas cidades españolas e que posteriormente continuará por outras localidades galegas e do sur da Península antes de regresar a Madrid. As entradas para as funcións xa están dispoñibles a través das canles habituais de venda.