As actividades que pon en marcha o Concello da Coruña no contexto deste programa vanse a realizar como un proxecto piloto durante o curso 2026/2027, co obxectivo de estender posteriormente a actividade e realizar, nun futuro, actividades adaptadas noutros colexios da cidade.

Trátase de actividades só para eles e elas, sempre sen deixar de lado as actividades compartidas e inclusivas que se desenvolvan na cidade dentro das políticas públicas municipais.

As actividades leven a cabo no propio centro para facilitar a conciliación laboral e que as nenas e nenos non se teñan que desprazar a outros lugares.

Actividades e horarios

As actividades están previstas de luns a venres, de 15:00 a 17:00 horas. Con todo, a saída do alumnado poderase adaptar ás necesidades de cada familia.

Establécense grupos reducidos dun máximo de 10 nenos/as, fóra da actividade de Creación "artística e artes escénicas inclusivas", que terá un máximo de 8 nenos/as. O total de prazas será de 48.

As actividades serán levadas a cabo a través de persoal especializado.

Procedemento de solicitude e adxudicación de prazas

Convócanse un máximo de 48 prazas, en réxime de concorrencia competitiva, para participar na actividade durante o curso 2026-2027.

A solicitude farase en liña a través da ficha específica: https://edu.coruna.gal/coruna_educa_familias/actividades_adaptadas_2026/

Tras completar a inscrición en liña, o sistema elabora un xustificante de confirmación (documento pdf), que se envía ao correo electrónico facilitado. Este xustificante contén un número de asignación (IDE), que será o de referencia de cada expediente no procedemento.

Tras a finalización do prazo de presentación de solicitudes, o Servizo de Educación, como responsable da instrución do procedemento, revisará as solicitudes presentadas e verificará o cumprimento de todos os requisitos da convocatoria. A persoa titular da Consellería delegada responsable da área de Educación resolverá a convocatoria por delegación da Xunta de Goberno Local.

A resolución da adxudicación de prazas farase publica o día 10 de xullo na páxina web educativa municipal www.corura.gal/educacion, podéndose consultar tamén a través do teléfono de información cidadá 010 do Concello da Coruña.

Tras a publicación da resolución de adxudicación de prazas, as persoas seleccionadas dispoñerán dun prazo, do 15 ao 24 de xullo, para a súa aceptación, que deberá ser asinada por ambos os proxenitores ou titores legais e comunicada por escrito ao Servizo Municipal de Educación, a través da sede electrónica do Concello da Coruña (/sede/gl/tramites-e-servizos-electronicos/rexistro-electronico), ou nun rexistro público do Concello da Coruña, de forma presencial. No caso de non poder presentar a aceptación de praza na sedes anteriores, por motivos de coidado do/a menor, poderá enviarse por correo electrónico a educacion@coruna.gal .

En todos os casos, no escrito teñen que aparecer os seguintes datos: nome do programa, nome do/a escolar, nº de IDE e actividades nas que foi admitido/a.

Unha vez transcorrido o prazo sen que se produza tal comunicación, entenderase que se renuncia á participación no programa.

Criterios de adxudicación de prazas

A medida que se vaian recibindo solicitudes en liña asignaráselles un número, por orde de chegada (número de IDE). Ese número será o que se tome de referencia para todo o procedemento.

Como norma xeral, tentarase asignar polo menos unha actividade a cada persoa solicitante, tendo en conta a orde de preferencia da actividade solicitada e as prazas dispoñibles nela. Se quedan prazas vacantes, asignaránselle máis actividades.

No caso de que exista máis demanda de prazas nalgunha das actividades, adxudicaranse por orde de chegada das solicitudes (número IDE).

Unha vez recibidos os comprobantes de aceptación das prazas adxudicadas, e se quedasen prazas libres, procederíase á súa adxudicación segundo a lista de espera.