As familias que resultaron admitidas no proceso de novo ingreso nas escolas infantís municipais xa poden formalizar a matrícula para o curso 2025-2026. O prazo estará aberto entre o mércores 25 e o luns 30 de xuño, ambos incluídos.

A listaxe definitiva de persoas admitidas publicouse o 23 de xuño e pode consultarse, xunto coa documentación requirida e os formularios, na páxina web municipal de  Educación .

Tal e como se indica nas bases reguladoras do proceso de admisión, a matrícula será xestionada por cada unha das escolas da REIM, debendo a persoa solicitante dirixirse á escola asignada e presentar a seguinte documentación. Recoméndase ás familias revisar con atención a documentación específica que deben achegar segundo a súa situación.

Por outra banda, o Concello anuncia que no mes de xullo se abrirá unha convocatoria extraordinaria para cubrir aquelas prazas vacantes que resulten dispoñibles tras esta fase de matrícula ordinaria. Os detalles serán publicados proximamente na web municipal.

O Goberno municipal dá continuidade á medida de gratuidade das oito horas de atención educativa, consolidada desde o curso 2022-2023 e que converteu á Coruña nunha cidade referente en apoio ás familias e á conciliación.