As palabras reflicten dun modo profundo os conceptos máis arraigados sobre a nosa visión do mundo e, ao mesmo tempo, moldean a realidade que nos arrodea. A través das palabras creamos novos escenarios, novas realidades que transforman o mundo. É por iso que ten un importante papel neste obradoiro o emprego dunha linguaxe inclusiva que promova valores de igualdade e diversidade.

Trátase de crear un espazo de confianza no que se verbalicen as miradas e pensamentos da adolescencia e mocidade, no que poidan compartir visións, valores, críticas e dúbidas achega do mundo que as/os arrodea, do que son axentes activos, e por suposto, importantes protagonistas.

Condicións do programa/taller

Contidos

Relación de temáticas que poden abordarse nos obradoiros:

a. Que é o feminismo? Por que se fala de feminismos e a súa importancia social?.

b. A igualdade na contorna dixital: youtube, instagram, tik tok... e as ciberviolencias de xénero.

c. As diferentes sexualidades e as Lgtbqi+fobias: modelos de masculinidade e feminidade.

d. Aprendizaxe da sexualidade e das relacións afectivo sexuais a través da pornografía.

e. A importancia da música e da publicidade na socialización da infancia, adolescencia e mocidade. Publicidade antisexista e contrapublicidade.

f. Quero ser matemática/o! A diversificación profesional. Profesións sen xénero. Situación actual.

g. Abordaxe da xestión emocional e a súa relación coa saúde mental, tendo en conta a perspectiva de xénero.

h. Abordaxe da diversidade (sexual, funcional, étnica, racial, cultural, imaxe física, identidade e orientación sexo-afectiva) e a súa relación co benestar físico e emocional, tendo en conta a perspectiva de xénero.

i. Activismo e liderado xuvenil: en que punto estamos e cal é o seu papel na consecución da igualdade?

As temáticas propostas poderán variar ao longo da execución do contrato para adaptarse ás novas realidades e necesidades detectadas polos centros educativos.

Duración

Cada obradoiro terá unha duración máxima de 4 horas. Poderán impartirse axustándose á dispoñibilidade do centro educativo, recomendándose dúas sesións secuenciadas consecutivamente o máis próximas posible no tempo.

Metodoloxía

A metodoloxía será participativa. O alumnado terá un importante papel protagonista segundo a natureza do taller, potenciándose tamén o traballo grupal.

1. Para o desenvolvemento

Presentación: a persoa facilitadora explicará en que vai consistir a actividade ao grupo e exporá algunhas indicacións básicas para o debate como as seguintes: argumentar e non facer alusións persoais, respectar as quendas, non berrar nin elevar a voz de forma excesiva; escoitar atentamente para poder rebater, non contestar de modo irreflexivo, persuadir, apaixonarse, pero sen ofender.

O debate é toda unha arte, pero o obxectivo non é que profunden na metodoloxía, senón que poidan crear un espazo de conversa aberta e argumentativa, dialogante, que facilite expoñer as súas miradas, puntos de vista, pensamentos sobre o tema para tratar.

Preparación: a persoa facilitadora fará unha presentación da temática escollida e proporá varias cuestións como punto de inicio para a preparación do debate. Empregaranse datos, vídeos, novas de actualidade etc, para encadrar, contextualizar o tema. O alumnado por equipos, prepararán os seus argumentos antes de iniciar o debate.

Debate: de maneira ordenada irán intervindo, guiados/as pola persoa facilitadora, procurando que os argumentos teñan un fío condutor, áxil, que facilite o debate. Será fundamental que as intervencións sexan argumentadas e respectuosas, sen coartar a liberdade para que cada persoa expoña o seu punto de vista, e será papel da persoa facilitadora e experta en igualdade, lanzar reflexións orientadas cara afianzar valores da igualdade e diversidade.

Finalización: para finalizar o foro-debate deixarase espazo para facer unha intervención de aproximadamente 30 segundos/1 minuto e expoñer unha frase/reflexión a modo de resumo que lles guste, unha mensaxe potente.

2. Aspectos xerais

Os contidos e materiais didácticos empregados estarán axustados ao nivel educativo e curso do alumnado participante.

O desenvolvemento do obradoiro abordará de maneira transversal o fomento de habilidades de comunicación e empatía entre o grupo de iguais.

Procedemento de actuación polo centro educativo

• Cada centro poderá seleccionar unha temática diferente por aula, acorde ás necesidades detectadas polo profesorado. Isto é, dentro dun mesmo curso, a temática para tratar pode ser diferente nas diferentes clases.
• Cada centro poderá seleccionar un máximo de dous obradoiros, seleccionando o centro educativo o nivel educativo e curso que considere máis adecuado dos que se relacionan no apartado de persoas "destinatarias".