Nesta charla explicará que son e de onde veñen as ferramentas CRISPR e para que serven. Mediante exemplos sinxelos ilustrará as súas múltiples aplicacións en edición xenética, para alterar a vontade a secuencia do ADN de calquera organismo. Esta tecnoloxía revolucionaria está chamada a xerar solucións innovadoras en bioloxía, biotecnoloxía e biomedicina. Ademais dos beneficios e das utilidades Montoliu sinalará as limitacións e os desafíos aos que nos enfrontamos para trasladar, con seguridade, esta tecnoloxía ao mundo real.

O traballo que desenvolve o Dr. Montoliu intenta entender como están organizados os xenes no noso xenoma e investiga sobre enfermidades raras, como o albinismo, usando modelos animais editados xeneticamente mediante as ferramentas CRISPR. O seu laboratorio intenta contribuír ao diagnóstico xenético universal de todas as persoas con albinismo no noso país e ao desenvolvemento de novas estratexias terapéuticas que poidan aliviar ou resolver a severa discapacidade visual que afecta as persoas con albinismo.