Normas xerais das visitas

• As persoas do grupo escolar maiores de 4 anos levarán en todo momento máscara durante a visita e respectarán unha distancia de 1,2 metros respecto de calquera outro visitante ou persoa traballadora do museo.
• Se hai algunha persoa con exención de máscara, o responsable do grupo escolar terá que informar o museo con antelación.
• Dispoñerase de servizo de despacho de billetes para gardar mochilas.
• O persoal docente acompañante será o responsable do cumprimento das normas de visita aos Museos Científicos Coruñeses.

CASA DAS CIENCIAS

Normas

• A capacidade máxima é de 80 persoas por grupo, incluído o persoal docente acompañante.
• Duración máxima da visita: 90 min.
• Prégase a maior puntualidade.

Oferta

• EXPOSICIÓNS

«Exploratorium». Novos módulos interactivos para sorprender, investigar efectos singulares, facer preguntas e aprender a procurar respostas. Vive en primeira persoa fenómenos relacionados coa luz, as ondas sonoras ou as forzas magnéticas.

«A astronomía como cha contan». Meteoritos, fósiles de dinosauro, fragmentos dunha nave espacial soviética ou dos paneis do telescopio espacial Hubble nesta exposición sobre a forma na que asimilamos as noticias de astronomía a través dos medios de comunicación.

«Puro Swing». Unha mostra sobre péndulos cos que xogar e aprender a facer música, bambearse dunha maneira diferente ou sentir no teu corpo as propiedades dos sistemas caóticos. Ademais dunha explicación do funcionamento do famoso botafumeiro.

• PLANETARIO

«Viaxando coa luz». NOVO. Un percorrido pola importancia da luz para a vida e a astronomía. O Sol proporciona a enerxía, a luz e a calor que fan posible a vida na Terra, pero os humanos tamén aprendemos a utilizar o lume e, hoxe en día, moitas outras fontes de luz artificial. Duración: 30 minutos. Idade: maiores de 6 anos.

«Lévameá Lúa». A chegada á Lúa é un dos fitos científico-tecnolóxicos que máis pegada deixou na historia da humanidade. Este programa afonda no coñecemento do noso satélite, o astro ao que sen dúbida máis miramos e admiramos do noso ceo. Duración: 45 minutos. Idade: maiores de 6 anos.

«A noite é necesaria». Programa sobre os efectos da excesiva iluminación das nosas cidades, desde a perda do ceo nocturno ata o seu impacto sobre a factura da iluminación pública, os ecosistemas nocturnos ou a nosa propia saúde. Duración: 30 minutos. Idade: maiores de 10 anos.

«Astronomía en directo». Unha sesión de planetario que comeza coa explicación dos astros máis notables que se poden observar no ceo na época da visita, para despois convidar a facer preguntas nunha conversa ilustrada con todos os recursos audiovisuais do planetario. Duración: 45 minutos. Idade: adaptada a calquera idade.

Dispoñemos doutros programas que poderás elixir no momento de formalizar a reserva.

DOMUS

Normas

• A capacidade máxima é de 25 persoas por grupo, sen contar o persoal docente acompañante.
• Os obradoiros organizaranse seguindo o mesmo protocolo sanitario que implementan as escolas para este tipo de actividades.
• Duración máxima da visita: 90 minutos.
• Prégase a maior puntualidade.

Oferta

• EXPOSICIÓNS

«Bocados». Unha exposición sobre a nutrición e os Obxectivos de Desenvolvemento Sostible. Aborda temas que van desde a vida urbana e a educación ata o acceso á auga, a saúde ou a igualdade de xénero, e expón o reto de pensar en global e actuar en local para a transformación cara a unha nutrición, e un mundo, máis sostibles.

• CINEMA

«Claqueta científica». É un programa audiovisual que convida o público escolar a descubrir o cinema producido polos nosos científicos e científicas e o que nos contan sobre a ciencia. Cada mes poderase asistir a unha selección diferente de tres vídeos científicos, que incluirán temas relacionados co medio ambiente, a investigación de fósiles ou a vocación científica, entre moitos outros. Gratuíto.

Ofreceranse estes títulos:

«Descobre con Tadeo». NOVO. Tadeo Jones é un guía ideal, entrañable, divertido e popular que amosa o traballo que realizan os centros de investigación en España. O intrépido explorador, protagonista da película de animación máis taquilleira da historia do cinema español, viaxará a diversos enclaves nacionais como as Covas de Altamira, o Parque Natural de Doñana, a Serra de Atapuerca, o Buque de Investigación Oceanográfico ou o Gran Telescopio de Canarias, entre outros. Duración: 20 minutos. Nivel educativo: Educación Primaria.

«Na procura do primeiro europeo». NOVO. Narra unha viaxe científica con moito humor e aventuras, no que Luís Quevedo dá vida a un mozo que busca respostas e Eudald Carbonell, científico e codirector dos xacementos de Atapuerca, un eminente arqueólogo ao máis puro estilo Indiana Jones. O documental recibiu numerosos premios, entre eles o premio Prismas Casa das Ciencias. Duración: 52 minutos. Nivel educativo: Educación Secundaria, Bacharelato e Ciclos Formativos.

«Wilmed, o último bosque mediterráneo». NOVO. É un documental sobre os bosques de serra Morena, un dos espazos naturais con maior singularidade de Europa; o maior bosque mediterráneo do mundo, cunha superficie dun millón de hectáreas, onde aínda voan as heráldicas aguias imperiais, mora o mítico lobo e caza o lendario lince ibérico. Este audiovisual obtivo o premio Prismas Casa das Ciencias e 8 candidaturas aos premios Goya no ano 2015. Duración: 50 minutos. Nivel educativo: Educación Secundaria, Bacharelato e Ciclos Formativos.

• OBRADOIROS E ACTIVIDADES

>> LABORATORIO ABERTO

1. PCR: Investigamos a escena do crime. NOVO. Experimentando coa técnica da PCR (reacción en cadea da polimerasa), o alumnado poderá simular a elaboración de perfís de ADN tal e como se realizan habitualmente nos laboratorios forenses. Duración: 2 horas e media. Nivel educativo: 4º de ESO, Bacharelato e Ciclos Formativos.

2. Xperimenta coas flores. NOVO. Cada estudante realizará a súa propia disección de flores con todo o equipo científico que se utiliza ao investigar a natureza. Duración: 1 hora. Nivel educativo: 3º a 6º de Educación Primaria.

3. Bocados. NOVO. Un obradoiro para descubrir a nutrición desde un novo prisma. Exploraremos os cereais, faremos cociña molecular e aceptaremos o reto dun concurso moi saboroso. Duración: 1 hora e media. Nivel educativo: 5º de Educación Primaria a 4º de ESO.

4. Como se desenvolven os fármacos? Participa na síntese dun novo fármaco que se está a investigar para tratar a enfermidade de Parkinson. Educación Secundaria (3º e 4º), Bacharelato e Ciclos Formativos. Duración: 2 horas.

5. Diseccións en directo. Duración: 1 hora. Nivel educativo: Educación Primaria, Secundaria, Bacharelato e Ciclos Formativos.

6. Artistas da prehistoria. Un obradoiro no que converterse nun artista prehistórico e coñecer os materiais, técnicas e temas favoritos dos nosos antepasados. Duración: 1 hora e media. Nivel educativo: Educación Primaria (3º a 6º) e Educación Secundaria (1º e 2º).

7. ExploraDomus Escola. A cociña é un laboratorio de ciencia! Un obradoiro para explorar a ciencia máis próxima. Duración: 1 hora e media. Nivel educativo: Educación Primaria (1º e 2º)

>> ESPAZO MAKER@DOMUS

1. «circuitos@domus». Un obradoiro para experimentar con baterías, lámpadas, timbres, chaves e moitos outros compoñentes eléctricos, para comezar a comprender o mundo da electricidade, así como crear conexións eléctricas entre obxectos cotiáns e descubrir outras moi sorprendentes.

Martes, de 11.00 a 12.30 horas. Nivel educativo: 5º e 6º de Educación Primaria; 1º e 2º de Educación Secundaria.

2. «robots_garabateadores@domus». A proposta é que o alumnado invente o seu propio dispositivo a motor que se mova das formas máis inesperadas e debuxe garabatos incribles. Construirase con elementos moi sinxelos e un motor que, ao vibrar, fai que o robot se mova pintando curiosos trazos.

Martes, de 11.00 a 12.30 horas. Nivel educativo: 5º e 6º de Educación Primaria; 1º e 2º de Educación Secundaria.

3. «electrónica_textil@domus». Fabrica unha pequena peza de tecnoloxía que podes vestir nunha festa ou cando ti queiras. Cose con fío condutor e usa outros materiais sofisticados para poder darlle á túa creación o aspecto que máis che guste.

Martes de 11.00 a 13.00 horas. Nivel educativo: 1º, 2º, 3º e 4º de ESO.

4. «autómatas_de_cartón@domus». Deseña e constrúe un mecanismo que che axude a contar unha historia. Explora e mellora as túas habilidades mecánicas e artísticas para facelo máis sofisticado e que se adapte máis ao relato que imaxinas.

Martes de 11.00 a 13 horas. Nivel educativo: 1º, 2º, 3º e 4º de ESO.

AQUARIUM FINISTERRAE

Normas

• Visita libre: máximo de 25 persoas por adulto/a responsable.
• Itinerarios: máximo de 50 persoas.
• Obradoiros: máximo de 25 persoas.
• Duración máxima da visita: 120 minutos.
• Rógase a maior puntualidade.

Oferta

• EXPOSICIÓNS

«Sala Maremagnum». Ademais de grandes acuarios, contén decenas de elementos museísticos que propoñen experiencias interactivas. Seguimos renovando os seus contidos, como o tanque cilíndrico e a Oceanosfera (o proxector esférico que permite simular fenómenos naturais a escala planetaria).

«Sala Isabel Castelo». «Fotógrafos da Natureza». Contén as fotografías galardoadas na última edición do concurso GDT European Wildlife Photographer of the Year. Inclúe imaxes que asombran pola beleza da natureza e mostran como tratamos e maltratamos esa mesma natureza; simultaneamente lémbranos a urxencia de protexela.

«Sala Humboldt». «Sexo azul». Presenta unha selección curiosa e divertida de especies que representan a variedade de estratexias reprodutivas dos animais acuáticos. Está formada por 20 módulos, que inclúen dez acuarios nos que se mostran peces e invertebrados mariños especialmente elixidos.

«Sala Nautilus». Está mergullada nunha gran piscina de cinco millóns de litros de capacidade e a súa decoración lembra a do gabinete do capitán Nemo a bordo do Nautilus. Ao redor da sala nadan os peixes de maior tamaño do acuario, como quenllas, corvinas, seriolas, douradas, robalizas e meros. Tamén hai bancos de xardas e xurelos.

«Exteriores». Neles exponse a áncora do petroleiro Mar Exeo, que o 3 de decembro de 1992 sobordou fronte á Torre de Hércules porvocando unha marea negra; e nas piscinas viven tres machos e nove femias de Phoca vitulina.

• OBRADOIROS E ACTIVIDADES

Os grupos escolares poderán reservar unha visita libre ao Aquarium ou complementala con algún dos nosos itinerarios:

1. «Veñen os peques». Os grupos de Educación Infantil terán a posibilidade de reservar unha visita guiada, e adaptada ao seu nivel, polos nosos espazos expositivos. Nivel educativo: Educación Infantil. Grupos de 50 persoas como máximo. Duración: 90 minutos.

2. «Mundo submarino». Os grupos de Educación Primaria poderán iniciar a súa visita cun itinerario polos acuarios da sala Maremagnum. Nivel educativo: Educación Primaria. Grupos de 50 persoas como máximo. Duración: 90 minutos.

3. «Viaxe ao Nautilus». Os grupos de Educación Secundaria poderán complementar a súa visita cunha charla sobre as especies que habitan o maior tanque do acuario. Nivel educativo: Educación Secundaria e Bacharelato. Grupos de 50 persoas como máximo. Duración: 45 minutos.

4. «Coñecendo as quenllas». Utilizando vídeos, instrumentos científicos e recursos dixitais preséntanse aspectos curiosos da bioloxía dos peixes e invertebrados mariños do Aquarium. Educación Secundaria. Duración: 30 minutos.

5. «As focas do acuario». Coincidindo co momento en que se dá comer ás focas impártense charlas sobre as características destes mamíferos mariños e sobre o adestramento veterinario que reciben. Todos os niveis educativos. Grupos de 25 persoas como máximo. Duración: 30 minutos.

>> INFORMACIÓN ADICIONAL

Prezos

> Cota especial*

• Casa das Ciencias: 0 €
• Planetario: 0 €
• Domus: 0 €
• Aquarium Finisterrae: 0 €

*Cota especial só para grupos con reserva previa nalgún destes casos:

• A Coruña | Grupos de centros educativos do Concello da Coruña.
• XANEIRO E FEBREIRO | Grupos que nos visiten nos dous primeiros meses do ano.
• AMIGOS | Se o centro escolar é socio da Asociación de Amigos da Casa das Ciencias.

> Tarifa reducida

Os grupos escolares sen cota especial, pero con reserva, teñen tarifa reducida:

Casa das Ciencias: 1 €

Planetario: 1 €

Domus: 1 €

Aquarium Finisterrae: 4 €

> Gratis total

En ningún caso pagan entrada:

• O PROFESORADO, se acompañan a un grupo escolar ou se van debidamente acreditados.
• O alumnado con DISCAPACIDADE FÍSICA Ou PSÍQUICA.
• Grupos cuxo profesorado asista a unha reunión de preparación previa da visita.

> Xornadas de portas abertas

Os tres museos son gratuítos estes días do curso 2021/2022:

• Semana da Ciencia. Do 15 ao 21 de novembro de 2021.
• Martes de Entroido. 1 de marzo de 2022.
• Día da Ciencia na Rúa. 6 de maio de 2022.
• Día dos Museos. 18 de maio de 2022.

Onde comer?

• Pícnic da Domus

Traede vosa comida ao pícnic da Domus. Haberá dúas quendas de luns a venres, ás 13.00 e 14.00 h, para unha capacidade máxima de 32 persoas.

Como reservar?

1. Escolle as visitas e/ou actividades que queres levar a cabo co teu grupo escolar nos Museos Científicos Coruñeses.

2. Enche a folla de reserva que podes descargar ao final desta páxina web.

3. Envíanos a folla de reserva correspondente cuberta a través dalgún destes medios:

• Correo electrónico: reservas@casaciencias.org
• Fax: Casa das Ciencias: 981 189 847 / Domus: 981 189 841 / Aquarium Finisterrae: 981 189 843.

> Importante

A reserva só quedará formalizada cando comuniquemos a confirmación do número exacto de prazas reservadas, a data ou datas de visita e o programa detallado.

> Máis información:

Teléfono: 981 189 848

Correo electrónico: reservas@casaciencias.org