A Semana da Ciencia nos Museos Científicos Coruñeses terá lugar, como estaba previsto, do 9 ao 15 de novembro. A entrada será gratuíta pero, debido ás circunstancias sanitarias, as condicións de acceso e visita serán como as que se están aplicando desde que reabriron no verán.

Así, será imprescindible reservar entrada, cun máximo de 3 días de antelación, nos enderezos web de reservas de cada un dos museos:

• Reservas para o Aquarium Finisterrae
• Reservas para o Planetario da Casa das Ciencias
• Reservas para os talleres da Domus

No Aquarium Finisterrae poderanse visitar as salas de exposicións (onde se deshabilitaron os elementos interactivos), a sala Nautilus e as piscinas exteriores onde viven as focas.

Na Casa das Ciencias o acceso está limitado á asistencia a sesións do Planetario; a visita libre ás salas de exposicións non está dispoñible.

E o acceso á Domus está limitado á fin de semana do 14 e 15 de novembro, en que se poderá acceder unicamente a un programa de actividades na sala maker@domus e o Laboratorio Aberto.

Todas as persoas que visiten os Museos Científicos deberán gardan unhas normas de seguridade, como usar de forma obrigatoria a máscara, sen válvula exhalatoria, durante toda a visita e manter a distancia de dous metros entre persoas que non convivan, evitando ademais tocar calquera obxecto ou superficie.