STEAMdomus é un novo programa xuvenil que busca promover a importancia das artes na educación en ciencia, tecnoloxía, enxeñaría e matemáticas á hora de lle proporcionar á mocidade, e en particular ás mozas, unha educación máis completa e unha visión máis ampla do seu futuro laboral.

As materias STEM son capaces de lles ensinar ás persoas o valor da creatividade, a innovación, a comunicación e a observación. Por iso esta proposta formula un programa de actividades para avanzar na educación STEAM. Cando se introduciu en educación o termo STEM (Ciencia, Tecnoloxía, Enxeñería e Matemáticas, polas súas siglas en inglés) buscábase un ensino destas materias dunha forma máis integrada. Recentemente, o termo STEM ampliouse para incluír o A, que representa as Artes, como forma de destacar a importancia da creatividade na educación STEM.

STEAMdomus inclúe obradoiros, conferencias e xornadas de orientación para alumnado de ESO e bacharelato dedicadas a campos como videoxogos, animación, produción audiovisual e intelixencia artificial desde unha perspectiva STEAM. As xornadas, que terán lugar pola mañá, serán os días 15, 18, 19 e 22 de maio e consistirán en:

• Encontro con profesionais da animación, os videoxogos, a produción audiovisual e a intelixencia artificial da man dos organizadores de Mundos Digitales, o Congreso Internacional de Animación, vfx e novos medios.

• Participación no escape room «Misión Domus».

• Visita ás salas de exposición da Domus.

É un proxecto subvencionado pola Consellaría de Cultura, Educación, Formación Profesional e Universidades.