A atención veterinaria diaria no Aquarium Finisterrae mantén o benestar da súa fauna. Estes coidados aplícanse a todos os animais, desde os de maior tamaño, como as focas, até os máis pequenos, como os peixes pallaso. Así, o pasado mes de xuño, un exemplar de caballito de mar de oito centímetros nado na Casa dos Peixes, da especie Hippocampus abdominalis, tivo que ser intervido cirurxicamente para o manter con vida.

Presentaba unha malformación de nacemento no abdome, un orificio polo que lle saían os órganos internos. Nunha primeira intervención, introducíronlle as vísceras no seu interior e pechouse o buraco. Uns días despois, logo de que a ferida cicatrizase, someteuse a unha segunda operación na que se lle retiraron os puntos. Ambas as intervencións tiveron que se realizar coa axuda dunha lupa, debido ao pequeno tamaño do peixe.

Unha vez que se comprobou que se movía con normalidade e que estaba recuperado, devolvérono ao tanque co resto dos exemplares da súa especie.