Os Museos Científicos Coruñeses estrean o luns 1 de xullo o seu horario de verán, que se estenderá ata o xoves 31 de agosto. Durante eses dous meses abrirán as súas portas desde as 10.00 h ata as 20.00 h, aínda que o acceso pechará ás 19.00 h no Aquarium Finisterrae e ás 19.30 h na Casa das Ciencias e a Domus.

Na Casa das Ciencias, ademais das exposicións interactivas dos seus catro plantas, o planetario ofrecerá a diario 5 sesións para diferentes públicos:

• 11.30 Polaris (+7 anos, castelán)
• 13.00 Lévame á Lúa (+8 anos, galego)
• 17.00 Hazelnuts (4 a 7 anos, galego) (excepto o 30 de agosto, que non haberá esta sesión)
• 18.00 Directo (+ 10 anos, cast/gal) (excepto o 31 de xullo e o 30 de agosto, que non haberá esta sesión)
• 19.00 Biosfera oscura (+10 anos, castelán) (excepto o 30 de agosto, que non haberá esta sesión)

Ademais, do 9 ao 14 de agosto todas as sesións de planetario (excepto na das 17.00 horas) dedicarán uns minutos para explicar como ver a choiva de estrelas das Perseidas.

A Domus ofreceralle ao seu público as numerosas experiencias interactivas de exposicións como «Bocados», sobre a nutrición e os Obxectivos de Desenvolvemento Sostible; «Xogo de neuronas», sobre a mente e a intelixencia humana; ou a mostra «Homínidos e homínidas», sobre as nosas orixes e a evolución dos trazos que nos identifican.

No Aquarium Finisterrae, ademais dos seus contidos habituais, ofreceranse diversas actividades e obardoiros sen necesidade de inscrición nin custo adicional á entrada de acceso ao museo:

• Alimentación no Nautilus. O público pode observar a alimentación dos habitantes do Nautilus, entre os que se inclúen diferentes especies de tiburóns como o touro e as musolas. Todos os luns, mércores e venres ás 11.30 h.

• Alimentación de focas. Unha actividade na que o público pode contemplar a rutina da alimentación das focas do Aquarium a cargo dos seus coidadores. Todos os días ás 12.00 e ás 17.00 h.

• Monólogos no Aquarium. Charlas breves, duns 10 minutos, sobre a bioloxía e curiosidades dalgunhas das especies máis populares do Aquarium (polbos, cabaliños de mar, axolotes, medusas...), ofrecidas polo persoal de atención ao público. Todos os días ás 13 e ás 18.30 horas.