O 3 de decembro de 1992, o buque petroleiro «Aegean Sexa» (Mar Exeo) encallou ao pé da Torre de Hércules, vertendo milleiros de toneladas de cru na costa coruñesa e creando unha voluminosa nube de fume negro que cubriu o ceo da cidade. O «Mar Exeo» pasou a formar parte da secuencia de catástrofes marítimas producidas ao longo da historia recente de Galicia.

Con motivo dos 30 anos do suceso nace «Cru: memoria coruñesa sobre o Mar Exeo», un proxecto da Asociación Sociocultural Zona Hadal cuxos resultados son o núcleo desta exposición. A través da metodoloxía da cartografía emocional realizáronse trinta entrevistas a persoas que, coas súas voces, conforman un relato colectivo sobre o vivido e o sentido. Cada unha delas aparece no mapa ligada ao lugar desde onde viviu o accidente.

O Aquarium Finisterrae constitúe un escenario ideal para esta reflexión, xa que naceu precisamente co obxectivo de promover o coñecemento da riqueza, a admiración pola beleza e o compromiso coa conservación deste mar ao que tamén pertencemos.

Contido da exposición

A mostra contén, por unha banda, unha colección de fotografías, realizadas por fotógrafos profesionais que cubriron o accidente, que dan testemuño gráfico de como se viviu na cidade. Ademais, preséntanse fragmentos das entrevistas realizadas que achegan o punto de vista de persoas desde diferentes ámbitos da sociedade. Complétase coas esculturas creadas polo artista Emile Gireau cos restos do naufraxio que aínda permanecen mergullados.

Exposición producida pola Asociación Sociocultural Zona Hadal, en colaboración co Aquarium Finisterrae-Concello da Coruña.

Fotografías: José Caruncho, Xosé Castro, Fernando García, Óscar París, César Quián, Juan Rodríguez e Antonio Vila. Coa colaboración de La Voz de Galicia.

Esculturas: Emile Gireau.Coa colaboración da Universidade da Coruña, WWF e Buceo Galicia.