Real decreto 1720/2007, do 21 de decembro, polo que se aproba o Regulamento de desenvolvemento da Lei orgánica 15/1999, do 13 de decembro, de protección de datos de carácter persoal, vixencia establecida no Boletín Oficial do Estado e mentres non se derrogue na súa totalidade cun novo regulamento que desenvolva a vixente Lei orgánica 3/2018, do 5 de decembro, de protección de datos persoais e garantía dos dereitos dixitais.

Co fin de garantir a necesaria seguridade xurídica nun ámbito tan sensible para os dereitos fundamentais como o da protección de datos, o lexislador declarou subsistentes as normas regulamentarias existentes e, en especial, os reais decretos 428/1993, do 26 de marzo, polo que se aproba o Estatuto da Axencia de Protección de Datos, 1332/1994, do 20 de xuño, polo que se desenvolven determinados aspectos da Lei orgánica 5/1992, do 29 de outubro de regulación do tratamento automatizado dos datos de carácter persoal e 994/1999, do 11 de xuño, polo que se aproba o Regulamento de medidas de seguridade dos ficheiros automatizados que conteñan datos de carácter persoal, á vez que habilitou o Goberno para a aprobación ou modificación das disposicións regulamentarias necesarias para a aplicación e desenvolvemento da Lei orgánica 15/1999.

Por outra banda, a Lei 34/2002, do 11 de xullo, de servizos da sociedade da información e de comercio electrónico e a Lei 32/2003, do 3 de novembro, xeral de telecomunicacións atribúenlle competencias en materia sancionadora á Axencia Española de Protección de Datos. Estas requiren de desenvolvemento regulamentario coa peculiaridade de que ambas as normas se ordenan á tutela non só dos dereitos das persoas físicas, senón tamén das xurídicas.