A «Feira de Ciencia Isabel Zendal» despregará nas salas do Aquarium Finisterrae talleres divulgativos sobre o mundo mariño e as expedicións marítimas, atendidos por profesorado e alumnado da Universidade da Coruña, ofrecendo ao público unha oportunidade para descubrir e aprender ciencia participando nunha diversidade de experimentos, xogos e actividades.

Para visitar este día o Aquarium Finisterrae, que celebra xornada de portas abertas con entrada gratuíta, e participar nos talleres, é necesario realizar unha reserva de entradas, que poderá realizarse a partir das 9 horas do mércores 4 de febreiro nesta dirección: https://ticketing.coruna.gal/mc2/aq/

Para facilitar o acceso ás persoas maiores de 65 anos, estas poderán acceder sen reserva, acompañadas doutra persoa se o necesitan.

Estes serán os talleres que se realizarán:

• Isabel Zendal e os 21 expósitos. Unha viaxe ao redor do mundo cunha enfermeira e 21 nenos expósitos grazas aos cales a Terra foi declarada zona cero de vexigas pola Organización Mundial da Saúde.

• Moluscopedia. Estudo dos moluscos mediante actividades prácticas baseadas na observación directa e a manipulación de exemplares.

• Ponte as pilas. Exploración do pequeno mundo escondido dentro dunha batería e como viaxa a enerxía para dar vida aos nosos distintos dispositivos.

• Linfocitos e sistema inmune. Que é e como funciona o sistema inmune, e o papel que desempeñan os linfocitos.

• As vacinas salvan vidas. Xogos e paneis interactivos para explicar que son e como funcionan as vacinas.

• A horta do capitán Nemo. Tipos de algas que habitan nas nosas costas, as súas características biolóxicas, e a súa aplicación en biotecnoloxía.

• O código secreto da vida. Experimentos de extracción de ADN e diferentes xogos para explicar cal é a función desta molécula e como xera a gran diversidade que existe nos seres vivos.

• Diversidade en focas. A través de xogos e actividades sinxelas explicarase a diversidade xenética que existe entre elas xerada por diferentes forzas evolutivas.

• Os superpoderes do polbo. Mediante varios xogos explicarase como a xenética e a evolución deron lugar ás increibles habilidades deste grupo de animais.

• Xenética baixo o mar. Xogos para comprender conceptos xenéticos básicos e imprescindibles como genotipo, fenotipo, cromosomas, variabilidade xenética...

A Feira está organizada por UDCiencia d+i, un grupo de divulgación científica e innovación docente da Universidade da Coruña, en colaboración co Aquarium Finisterrae.