O alcalde da Coruña, Carlos Negreira, destacou esta mañá tanto a "madurez cívica" da cidadanía e dos condutores como o dispositivo especial de tráfico da Policía Local con motivo das obras de urbanización da Marina, un proxecto que crea 1.380 postos de traballo e onde, segundo explicou o rexedor coruñés, as tres administracións que financian metade da infraestrutura poderán recuperar a investimento grazas ao retorno fiscal.

"As obras da Marina son financiadas ao 50%: por un lado, a concesionaria, e polo outro, as tres administracións [Concello, Xunta e Goberno central] que, ademais, grazas ao retorno fiscal, poderán recuperar máis do que poñen. Estamos falando de que o 60% do que se inviste xa se recupera directamente a través do IVE, IRPF ou a Seguridade Social", sinalou o alcalde.

Carlos Negreira afirmou que a reurbanización da Marina e O Parrote supoñerá recuperar "o corazón da cidade", con máis de 50.000 metros cadrados para uso e goce da cidadanía, á vez que supón xerar 1.380 postos de traballo coa execución deste proxecto. "Que custo significou ter 6 anos un buraco negro, vetando espazos públicos ao uso cidadán?", preguntouse o alcalde, quen avanzou que se está concluíndo a urbanización do Parrote para que a partir do próximo 25 de xuño se poña a disposición da cidadanía 22.000 metros cadrados de espazos públicos, ademais do aparcadoiro subterráneo con máis de 600 prazas.

O alcalde explicou que, aproveitando as obras da Mariña, remodelarase o túnel de María Pita, pois despois de 30 anos sen acometer unha reforma deste paso subterráneo é necesario realizar traballos de acondicionamento durante catro meses, dotándoo de novas instalacións eléctricas e de bombeo. "Espero que dentro dun ano non botemos de menos os coches que ata agora circulaban pola Marina e O Parrote", concluíu.

BICICLETA

O alcalde tamén anunciou que o Concello, a través da Empresa Municipal de Vivenda, Servizos e Actividades (EMVSA), ampliará as estacións de Bicicoruña e o número de bicicletas na rúa para mellorar o servizo aos actuais e potenciais usuarios deste sistema de transporte de mobilidade sustentable.

En total, colocaranse de maneira progresiva 7 estacións e 100 novas bicicletas. En concreto, o Concello instalará unha no Castrillón -unha vez que se constrúa o novo centro deportivo do barrio- e outras seis, cun total de 96 postos de ancoraxe e recollida de bicicletas en diferente puntos da cidade:

- 1ª ampliación. Finais de xuño. Elviña e Paseo das Pontes. 40 bicicletas.

- 2ª ampliación. Outubro. Ágora e Castelo de San Antón. 30 bicicletas.

- 3ª ampliación. Febreiro do 2015. Praza de Galicia e Adormideras. 30 bicicletas.

Coas novas bases, o Concello achégase ao obxectivo de que entre unha estación e outra da cidade exista unha distancia máxima de 500 metros. Actualmente, os usuarios dispoñen de 19 bases, polo que coas 7 novas chegarase ás 26, o que supón un incremento do 37%. As 19 paradas actuais son Millennium, Casa da Auga, praza de Pontevedra, As Lagoas, Torre de Hércules, Palexco, Obelisco, estación de buses, estación de trens, miradoiro dos Castros, Os Rosales, As Conchiñas, praza de Vigo, praza de Tabacos, Matogrande, rúa Sol, Campo de Marte, praza de España e Sagrada Familia.

PARADAS NOVAS

1. Elviña: dará servizo a equipamentos públicos (biblioteca González Garcés; centro cívico de Monelos, mercado de Elviña, instituto Ramón Otero Pedrayo e os Novos Ministerios).

2. Paseo das Pontes: permitirá relacionar a base da praza das Conchiñas co resto da cidade e conectar as bases da praza de Pontevedra e a Casa da Auga.

3. Ágora: será unha localización estratéxica xunto ao centro sociocultural e dará servizo a dous dos barrios máis densamente poboados (Agra do Orzán e O Ventorrillo).

4. Castelo de San Antón: dará servizo ao carril bici do paseo marítimo e a dotacións públicas da zona, como o Castelo de San Antón, o Hospital Abente y Lago, Museo Militar, Xardíns de San Carlos ou o Instituto Oceanográfico.

5. Praza de Galicia: permitirá relacionar as prazas de Pontevedra, Lugo, Ourense e Vigo.

6. Adormideras: dará continuidade ás estacións do paseo marítimo e favorecerá a conexión deste barrio co resto da Coruña.

7. O Castrillón: dará servizo ao barrio e ao novo equipamento deportivo.

CARRIL BICI

O alcalde tamén destacou que o número de usos de bicicletas do servizo de Bicicoruña está crecendo, pois pasou dos 139.000 do 2011 aos 170.000 do ano pasado, o que supón un incremento do 22%. Á implantación de novas bases e máis bicicletas nos próximos meses súmase o proxecto presentado esta semana para crear un carril bici metropolitano que conecte cinco municipios (A Coruña, Arteixo, Cambre, Culleredo e Oleiros) a través dun percorrido de 78 quilómetros: "O carril bici deixará de ser unha infraestrutura individual para converterse nunha infraestrutura colectiva e de carácter metropolitano", sinalou Carlos Negreira.

No caso concreto da Coruña, a cidade pasará dos 15 quilómetros actuais de carril bici non continuos que teñen na actualidade a 20 quilómetros unidos e que permitirán desprazarse en bicicleta por toda a costa da comarca e internarse cara ao interior da ría do Burgo e chegar ata Cecebre.