Tras unha breve presentación por parte do autor do documental e do director de Sustentabilidade de Frinsa, Jorge Candán e José Aller, teremos a ocasión de ver, por primeira vez na Coruña, a longametraxe "El legado de las rías gallegas", unha película para a que Candán, recoñecido fotógrafo e documentalista mariño percorreu, durante máis dun ano, o máis profundo das rías galegas, co obxectivo de mostrar a vida salvaxe que se esconde debaixo das augas da fin da terra, e plantar así a semente dun compromiso de procura do equilibrio entre produtividade e conservación.

Con esta actividade pretendemos contribuír á divulgación e o coñecemento do valor natural das Rías Galegas para a economía, gastronomía e cultura de Galicia. Tras a proxección haberá unha quenda de preguntas e respostas co autor.

O fotógrafo vigués Jorge Candán é un dos fotógrafos submarinos máis recoñecidos do noso país. Nos seus máis de 20 anos de traballo nas profundidades mariñas realizou impresionantes traballos como "Prometeo encadenado", "Mar de estrellas" e "Mar de un bosque encantado", e gañou numerosos premios en distintos festivais de fotografía debaixo do mar, como o primeiro premio que obtivo no Festival de Cinema Submarino de San Sebastián. É un experto coñecedor das profundidades do mar galego.