Formada por algúns dos máis importantes músicos da escena galega actual no mundo do jazz, a música sinfónica e a música tradicional, a Orquestra de Jazz de Galicia traerá temas populares galegos que chegaron a nós pola tradición oral e que dialogarán sobre o escenario coa música improvisada contemporánea. Entre as xoias das que o público poderá gozar esta noite, O toque de chifre de Faramontaos, rexistrada en 1952 polo musicólogo estadounidense Alan Lomax nunha aldea de Ourense, e que será interpretada de novo en Galicia máis de medio século despois de que Miles Davis e Gil Evans a convertesen na mundialmente coñecida The Pan Piper.

Música que transita entre a sofisticación do arranxo, a tímbrica orquestral e a beleza espida e desprovista de artificio de melodías tradicionais galegas para gozar deste día de música coa Orquestra de Jazz de Galicia.