Unha mirada máis profunda e un compromiso aínda máis forte co mar de Galicia, así formulamos a terceira edición do Festival Mar de Mares, que contará coa exposición do fotoxornalista Xulio Villarino que por primeira vez amosa o conxunto da súa obra ao redor do noso mar, e coa impresionante viaxe ao fondo das augas de Jorge Candán, que presenta por primeira vez na Coruña o seu documental O Legado das Rías Galegas. Tamén gozaremos da experiencia e boas artes das redeiras galegas, convertidas nun dos máximos expoñentes da artesanía galega, a través da súa exposición Enredadas.

E como sempre, contaremos cunha ampla oferta en gastronomía de mar, con talleres e degustacións, obradoiros científicos, propostas de activismo, música, presentacións actividades de reciclaxe e artesanía para toda a familia, a través das cales buscamos pasar un bo intre e sensibilizar no coidado e preservación dos océanos.