O Concello da Coruña, a través do Servizo de Educación, organizará o próximo día 27 de novembro unha charla-coloquio con Bebeto, ex xogador do Deportivo, orientada a escolares de entre 11 e 14 anos, na que abordará, baixo o título "Humildade e traballo. Encontro con Bebeto", a importancia de aspectos como a solidariedade, o compañeirismo e a superación.

A actividade pretende trasladar a importancia dos valores que transmite o deporte e a súa aplicación na vida cotiá. Para iso contarase cunha figura de referencia do mundo do fútbol, especialmente atractiva para o alumnado da cidade, tendo en conta que José Roberto Gama de Oliveira, máis coñecido como Bebeto, foi unha das figuras principais do denominado Súperdepor e é por tanto un personaxe de referencia non só na recente historia deportiva da Coruña senón tamén na vida social e colectiva da cidade.

A participación nesta actividade, que se desenvolverá o día 27 de novembro no centro cultural Ágora, en horario de 10 a 12 horas, será gratuíta, aínda que será imprescindible inscribirse a través dunha ficha específica á que se pode acceder na seguinte ligazón: ligazón á ficha de inscrición.

Debido ao aforamento do Ágora, a asistencia determinarase por orde de inscrición, cun máximo de 400 prazas, estando limitada a participación a escolares de 5 º e 6º de Primaria e de 1º, 2º e 3º da ESO de centros públicos da cidade. O Servizo de Educación facilitará a participación poñendo a disposición dos centros autobuses gratuítos, con horario de recollida do alumnado ás 9.30 e regreso ao centro a partir das 12 horas.

O alumnado asistente terá tamén a oportunidade de recibir un exemplar do libro "Bebeto, o home que arrolou o gol", escrito polo xornalista Alex Centeo, e fotografarse co ex xogador do Deportivo, para o que será necesario que dispoñan da correspondente autorización para a cesión da imaxe.

Aspectos a ter en conta

Destinatarios: alumnado de 5º e 6º de EP e 1º, 2º e 3º de ESO de centros públicos da cidade.

Cando: xoves 27 de novembro de 2025.

Horario: de 10:00 a 12:00 horas.

Onde: Auditorio do Centro Sociocultural Ágora

Inscrición: Desde o 4 de novembro ás 09:00 horas e a través da seguinte ligazón: acceso á ficha de inscrición. La asistencia será determinada por orde de inscrición, cun máximo de 400 prazas.

Contacto

Servizo Municipal de Educación

educacion@coruna.gal

Tlf. 981 184 200 (ext. 10179)