O  concelleiro de Economía e Emprego, Alberto Lema, vén de valorar os datos do tráfico de persoas pasaxeiras deste 2016 no aeroporto de Alvedro, ano no que o aeródromo coruñés superou o millón de usuarias, acadando a cifra total de 1.063.291 pasaxes, o que supón un aumento dun 3,7% respecto ao ano 2015. O edil valorou positivamente a cifra, a cal cualificou de "satisfactoria", posto que sitúa o ano que vén de rematar "como o quinto mellor dato do histórico dispoñible de Alvedro en canto ao número de pasaxeiros que voaron desde A Coruña". "Os datos referendan a estratexia deste Goberno local para o aeroporto", afirma o responsable municipal, "posto que, se temos en conta que este ano houbo unha alta taxa de desvíos, en particular no mes de febreiro, o balance final anual mostra uns datos moi positivos de crecemento". Nesta sentido, o concelleiro sinala que neste 2016, o executivo coruñés mantivo a tendencia de aumento no aforro sobre os convenios aeroportuarios, aos que destinará 1,3 millóns de euros o próximo ano, "ao tempo que se amplía o número de asentos", e recorda que no 2015 a negociación coas aeroliñas supuxo un aforro de 1,6 millóns de euros en relación ao custo comprometido ese ano polo anterior executivo local. "As cifras do balance anual mostran, pois, que o retorno entre o que investimento que fai o Concello e o número final de persoas pasaxeiras é moi bo, e que a proposta de traballo do Goberno local para Alvedro están ben deseñada", expón, ao indicar ademais o aumento que tamén experimentan tanto o tráfico de operacións (6,5% máis respecto ao 2015) como o de mercancías (31% sobre o ano anterior).   

Nesta liña, o responsable da área de Turismo asevera tamén que o pasado mes de decembro Alvedro acadou a cifra de 84.223 persoas que voaron desde a cidade, o que supón un incremento dun 4% sobre a cifra rexistrada no mesmo período de 2015, "e o sitúa como o segundo mellor decembro do histórico do aeroporto".

O concelleiro avanza que, de cara o 2017, "o balance positivo continuará", pois o executivo coruñés seguirá a traballar para aumentar o tráfico do aeroporto "e incorporar máis competencias en forma de novas compañías". "Estamos seguros que esta tendencia positiva de incremento de viaxeiras e viaxeiros tamén se confirmará o ano que vén, pois por fin estará dispoñible unha reclamación histórica da cidadanía como é a terceira frecuencia diaria con Barcelona todo o ano, o que suporá unha subida considerable no número de persoas viaxeiras e que, por tanto, repercutirá positivamente no balance anual", valora.  

En canto aos desvíos que se poidan producir nos próximos meses "e reducir así sensiblemente o número total de persoas viaxeiras", Lema lembra que o executivo coruñés solicitou de forma reiterada ao Ministerio de Fomento "que implante as medidas necesarias para que, ante condicións meteorolóxicas adversas, sexa máis doada e posible a aterraxe desde a cabeceira sur do aeroporto". "Visto que a ampliación da pista non solventou o problema de operatividade, cómpre buscar desde a administración estatal unha solución adecuada, xa que esta falla supón un custe importante para a cidade", afirma o edil. Ao fío, o responsable municipal tamén insta á Xunta de Galicia "a facerse cargo das súas responsabilidades" e achegar "unha proposta de coordinación" entre os tres aeroportos galegos. "Levamos máis dun ano agardando por algún tipo de achega desde a Xunta que non da chegado", asegura, "nin se albisca que nun futuro próximo se faga. Este mapa aéreo é necesario para colaboración entre as cidades e ampliar así as posibilidades da marxe de mellora en canto ao tráfico dos tres aeródromos".