No último ano, o goberno local, a través da área municipal de Deportes, abordou a renovación, mellora e colocación de máis dunha trintena de canastras deportivas en zonas públicas da cidade non propiamente deportivas, senón de rúa. O concelleiro do ramo, José Manuel Sande, salientou que as actuacións nesta liña entroncan co ambicioso Plan de Renovación de Equipamentos Deportivos de Rúa, que o seu departamento activou ao chegar á María Pita no verán de 2015. "Este goberno non só levou e está a levar a cabo unha importante mellora nas instalacións deportivas da cidade de carácter máis profesionais, senón que tamén aposta polas intervencións en vía pública, xa que o deporte, como vemos, tamén se vive na rúa, un lugar absolutamente democratizador e igualitario", comentou o edil. En concreto, e dentro das últimas actuacións abordadas destaca a renovación da canastra situada en Durmideiras e a colocación doutra no parque do Paseo das Pontes. No primeiro caso, realizouse unha reparación en profundidade, mentres que no segundo a instalación viu motivada polo desexo de agrupar nunha mesma zona do espazo público as estruturas relacionadas co ocio e a práctica deportiva.

Por outro lado, a inicios do verán pasado leváronse a cabo actuacións en 28 canastras situadas en espazos públicos non deportivos da cidade. Estas actuacións, na maioría dos casos constaron de pintado, reparación de aros, substitución de redes, revisión de ancoraxes, etc. Posteriomente, no mes de novembro, volvéronse a levar a cabo distintas intervencións de mantemento, debido ao elevado uso que teñen estas infraestruturas. Tamén se procedeu á instalación dunha nova canastra, neste caso, no Parque de Oza e en base a unha petición cidadá, así como outra na Falperra.