O Concello da Coruña quere manifestar o seu pesar polo falecemento esta xornada de Domingos Merino, quen foi alcalde da primeira Corporación municipal tras a ditadura, así como trasladar o seu pésame á súa familia e persoas achegadas. Nado na Coruña, foi sempre un gran defensor das liberdades tanto dende o Pazo de María Pita, como nos outros postos públicos que ostentou ao longo da súa vida.

Coa intención de permitir á cidadanía participar da despedida a Merino, o Concello instalará unha capela ardente no Salón de Plenos do Pazo de María Pita. Está previsto que a recepción oficial do féretro se produza contra as 10.00 da mañá do venres. A capela ardente quedará aberta á veciñanza a partir das 11.00 horas e así se manterá até as 16.00 horas, momento no que haberá un acto de despedida que contará coa intervención do alcalde, Xulio Ferreiro.