A Coruña inaugurará o vindeiro 1 de agosto as Festas de María Pita co pregón de Lucía Veiga e a actuación de Luz Casal. A alcaldesa, Inés Rey, anunciou estas primeiras confirmacións das Festas de María Pita. "Iniciamos por todo o alto as celebracións de agosto na cidade, cunha das grandes voces da música estatal e un dos rostros máis coñecidos do audiovisual galego", indicou Rey. A cantante de Boimorto será a primeira artista do programa festivo, nun concerto co que dará comezo un mes de actividades culturais e musicais en diferentes espazos da cidade. Antes, a actriz coruñesa e presidenta da Academia Galega do Audiovisual, Lucía Veiga, será a responsable de dar o pregón desde o balcón do Palacio Municipal de María Pita.

Luz Casal presentará o seu novo espectáculo, 'Me voy a permitir', un proxecto no que ofrece "o traballo máis ecléctico e inclasificable da súa carreira", no que amosa dez formas de entender o mundo a través de dez cancións. A artista reivindica neste directo a liberdade creativa e a súa capacidade para transitar entre estilos, desde a chanson francesa ao rock, consolidándose como unha das intérpretes máis versátiles do panorama musical.

Este novo espectáculo configura unha ponte entre pasado e futuro, na que Luz Casal reafirma a súa condición de compositora intuitiva e intérprete excepcional, capaz de habitar cada canción con personalidade propia. Cunha traxectoria consolidada e o recoñecemento do público e da crítica, a artista será a encargada de abrir "un cartel que converterá A Coruña nun referente cultural durante todo o mes de agosto", indicou Inés Rey.

Ademais, as festas arrancarán oficialmente co pregón da actriz coruñesa Lucía Veiga, que asumirá o papel de pregoeira nesta edición. Coa súa participación, o Concello aposta por unha figura destacada da cultura galega contemporánea para dar inicio ás celebracións, reforzando o vínculo entre a programación festiva e o talento local.

Lucía Veiga (A Coruña, 1979) é unha actriz dos Mallos cunha sólida traxectoria no teatro, o audiovisual e a comedia. Formada en interpretación e cunha destacada presenza na escena galega, combinou ao longo da súa carreira montaxes teatrais con participación en series e programas de televisión, onde acadou gran popularidade polo seu talento para a interpretación e o humor. Nos últimos anos consolidouse tamén como unha das voces máis recoñecibles da comedia en Galicia, cun estilo persoal que mestura retranca, frescura e crítica social, converténdose nunha figura moi querida polo público. Un dos grandes fitos da súa carreira foi a súa candidatura para os Premios Goya polo seu papel en 'Soy Nevenka'.

As Festas de María Pita volverán ofrecer un amplo programa de concertos, actividades culturais e propostas para todos os públicos, consolidándose como unha das citas máis destacadas do verán galego.