O programa educativo Mus-e 2025-26 , organizado polo Servizo Municipal de Educación en colaboración coa Fundación Yehudi Menuhin España, permitiu, ao longo deste primeiro trimestre, fomentar a educación en valores a través das artes entre nenos e nenas de varios centros da cidade.

No caso do CEIP San Pedro de Visma, os nenos e nenas participaron en varias sesións nas que puideron traballar a relación co seu propio corpo a través do movemento, entendendo a danza como unha linguaxe que non necesita palabras para comunicar.

Mediante dinámicas sinxelas e accesibles, o grupo explorou distintas formas de desprazarse, deterse e coordinarse con outros e outras. Un traballo que permitiu reforzar a cohesión de grupo, convertendo a cooperación nunha parte esencial do proceso creativo, e entendendo que o resultado final depende do equilibrio entre o individual e o colectivo. Traballando para escoitar o propio corpo e o dos demais, fortaleceuse a confianza e o respecto mutuo entre nenos e nenas.

Programa Mus-e

O programa educativo Mus-e ten como obxectivo o traballo desde as artes no ámbito escolar, como ferramenta que favorece a integración social, educativa e cultural do alumnado e as súas familias. O programa realízase a través de sesións e talleres impartidos por artistas en activo, de diferentes culturas, cunha elevada formación artística e experiencia pedagóxica, nos que se tenta que as persoas participantes (menores, familias e docentes) canalicen a súa creatividade, reforcen a súa autoestima e melloren as súas aprendizaxes.

Este programa, que continuará, desenvolvéndose durante o resto do curso, é posible grazas á colaboración da Consellería de Educación, Ciencia, Universidades e Formación Profesional da Xunta de Galicia, á Consellería de Política Social e Igualdade da Xunta de Galicia, á Fundación Paideia Galiza, e ao Concello da Coruña.

_{Fonte: https://fundacionyehudimenuhin.org/en-o-ceip-san-pedro-de-visma-de-a-coruna-os-mozos-e-mozas-traballan-achega-de-a-conciencia-corporal-e-a-traves-de-a-danza-como-ferramenta-de-expresion/}