A alcaldesa, Inés Rey, asistiu hoxe á actividade interxeracional de seguridade viaria que o Concello organizou no Colexio Karbo. A formación, pensada para impartir conxuntamente coñecementos e consellos a avós e netos, foi impartida por axentes da Policía Local como parte da campaña do Goberno municipal para previr accidentes de mobilidade na cidade, especialmente entre os segmentos de poboación máis vulnerables. A alcaldesa estivo acompañada pola concelleira de Seguridade Cidadá, Montserrat Paz.

"Con estas formacións non queremos somentes trasladar coñecementos teóricos, queremos dar as ferramentas para desenvolver habilidades, actitudes e estratexias prácticas que lles permitan ás persoas de todas as idades moverse con confianza na súa contorna. O factor interxeracional é fundamental. O 70% das vítimas mortais de atropelo nas cidades son persoas de máis de 65 anos. Iso é algo que hai que cambiar. Nós, protexendo, e a cidadanía cumprindo as regras e os consellos dos que saben", subliñou Inés Rey. 

A alcaldesa tamén remarcou o empeño do executivo local por avanzar cara a un modelo de mobilidade urbana que poña os peóns no centro, para facer unha cidade "que se poida pasear en todos os barrios e non só no centro". 

Esta iniciativa ten como finalidade reforzar a autonomía e a seguridade das persoas maiores nos seus desprazamentos cotiáns e proporcionar ferramentas que lles permitan desenvolverse con confianza na contorna urbana e, á vez, iniciar o alumnado de educación infantil na dita autonomía e seguridade desde modelos de referencia próximos. 

A proposta incorpora unha perspectiva interxeracional que favorece a aprendizaxe compartida entre persoas maiores e escolares dos primeiros cursos de educación primaria. A través desta iniciativa, promoverase a implicación das persoas maiores na formación dos máis pequenos para procurar fortalecer a conciencia colectiva sobre a importancia dunha mobilidade segura, accesible e respectuosa para todas as persoas. 

"A tarefa das persoas que traballamos desde o Concello é crear as condicións para que os colectivos máis vulnerables poidan camiñar polas rúas tendo os coñecementos de como actuar en cada caso para non poñer en perigo a súa saúde e integridade física", engadiu Rey.