O Concello comezou esta semana as obras de humanización da rúa Páramo, na Agra do Orzán, un importante proxecto incluído no Plan de Barrios 2025-2027 aprobado por Inés Rey e que supón un investimento de case 340.000 euros. Con esta actuación avánzase nos obxectivos de mellora marcados para o barrio. 

"O Concello está a traballar para chegar a todos os barrios da cidade, con especial atencións aos que presentan maiores necesidades de melloras estruturais. A Agra do Orzán é unha parte fundamental da Coruña, con máis de 30.000 veciñas e veciños, e cremos que con actuacións como esta estamos a dar pasos para mellorar a calidade de vida da cidadanía", subliñou o concelleiro de Infraestruturas, Jesús Celemín. 

Entre as actuacións contempladas, inclúense a execución de pavimentos peonís dispoñendo firmes diferenciados para a mellora da accesibilidade, a renovación da calzada, a implementación dunha nova rede de pluviais, a renovación dos tramos antigos da rede de saneamento e a modificación da canalización de iluminación.

Ademais, se procederá á ampliación da beirarrúa na zona previa ao paso de peóns, co obxectivo de mellorar a visibilidade dos viandantes ao cruzar a calzada, e se disporá novo mobiliario urbano nas zonas peonís. Tamén prantarase arboredo naqueles puntos onde non existan servizos subterráneos e onde a súa presenza non comprometa a visibilidade nin a seguridade -que tamén será reforzada coa adecuación da sinalización viaria-. 

Un compromiso coa Agra do Orzán

O pasado mes de xullo, o Concello tamén adxudicou o outro gran proxecto de humanización que está a levarse a cabo no barrio, o da rúa Agra do Orzán, na intersección entre a rolda de Nelle e as rúas Meira, Bellavista e Ramón María Aller, cun investimento que supera os 200.000 euros para un proxecto que ten como obxectivo avanzar na modernización da contorna e a mellora da calidade urbana. 

"Este Goberno quere que a transformación deste barrio sexa visible para toda a veciñanza. Que vaia máis aló das palabras e que falen os feitos. Actuamos en todos os barrios para construír unha cidade máis verde, máis cómoda para a cidadanía e con mellor calidade urbana", engadíu Celemín.

As obras en marcha, súmanse a todas as que xa están en marcha no Plan de Barrios 2025-2027, que leva máis de 81 millóns de euros mobilizados en investimentos en toda a cidade.