O Nadal da cidade da Coruña xa está en marcha. Tras o acto oficial de acendido de luces que tivo lugar onte en María Pita, coa participación do exfutbolista deportivista Bebeto, esta mañá celebrouse unha das citas tradicionais destas datas: o acendido do alumeado festivo do mercado municipal de Elviña, no que participaron a alcaldesa, Inés Rey, e a concelleira de Emprego, Comercio e Mercados, Diana Cabanas.

No acto, organizado pola Asociación de Comerciantes do Mercado de Elviña, con Leonardo Tomé á fronte, tamén tomou parte a presidenta da Asociación de Amas de Casa, Rosa Otero, que foi nomeada Filla Adoptiva da cidade en outubro deste ano, sendo a primeira muller na historia da Coruña en obter este recoñecemento.

Na súa intervención, Inés Rey puxo en valor "os méritos e traballo desinteresado de Rosa durante toda a súa vida", lembrando o seu papel para recoñecer ás amas de casa e mulleres traballadoras que, "a un lado ou o outro do mostrador, fixeron todo o posible por sacar ás súas familias adiante".

A rexedora tamén incidiu na profesionalidade e traballo diario das e dos praceiros, "persoas que dan vida a un mercado que é moito máis que un espazo comercial, porque tamén é un punto de encontro e interrelación social para a veciñanza e un piar fundamental para dinamizar os barrios próximos".

Pola súa banda, Leonardo Tomé fixo fincapé no legado de Rosa Otero para o conxunto da cidade, "sendo unha veciña á que temos especial cariño e coa que cómpre destacar o seu valor como unha persoa loitadora".