O circuíto de carreiras nos barrios Coruña Corre celebrará a súa terceira proba o domingo 10 de maio coa XVII Baixada Popular de San Pedro de Visma, unha das carreiras máis esixentes do circuíto. As inscricións tanto para esta proba como para o conxunto do circuíto pecharanse este domingo, 3 de maio, ás 23.59 horas. As persoas inscritas no circuíto deberán confirmar tamén a súa asistencia en www.corunacorre.com. 

O concelleiro de Deportes, Manuel Vázquez, convidou a cidadanía a participar na proba e no circuíto, que "constitúe un bo achegamento ao deporte e á vida saudable, ofrecendo percorridos de pouca esixencia". "Desde o Goberno de Inés Rey seguimos dando pasos para mellorar este circuíto, único en Galicia, que cada ano suma novos barrios e melloras nos percorridos", indicou Vázquez.

Serán case 6,5 quilómetros cun punto de control a medio camiño, no quilómetro 3,6. A partir do quinto, as e os participantes enfilarán o descenso pola estrada de Mazaído a Visma, e chegarán á meta na recta principal de San Pedro de Visma.

Como xa é habitual, a carreira do domingo 10 de maio sairá desde o cruzamento entre as rúas San Pedro de Visma e Aguillón, na contorna do centro cívico municipal. As e os participantes en categoría absoluta arrincarán motores ás 10.00 horas, e xa a partir das 11.15 comezarán as saídas progresivas das categorías inferiores, desde a sub-18 ata os peques.