A V edición do programa educativo "Intercambio Escolar. Vivir nos municipios do Eixo Atlántico 2025/2026" xa ten representante para o municipio da Coruña. Tras a reunión da comisión de valoración o pasado xoves 5 de marzo, e despois de que non se presentasen alegacións nin renuncias á adxudicación provisional, acordouse propoñer a adxudicación definitiva ao grupo de 6º curso do CEIP de Prácticas, co seu proxecto "Mirándonos de fronte". Cabe destacar tamén as excelentes propostas presentadas polos centros CEIP Eusebio da Guarda e CEIP José Cornide Saavedra.

O intercambio escolar desenvolverase nas seguintes datas:

• A recepción do grupo de 6º curso do Agrupamento de Escolas Abel Salazar de Guimarães na Coruña, será os días 21, 22 e 23 de abril.
• A viaxe do grupo de 6º curso do CEIP de Prácticas da Coruña de Coruña a Guimarães, será os días 11, 12 e 13 de maio de 2026.

O programa "Intercambio Escolar Eixo Atlántico " busca facilitar o intercambio entre escolares dos diferentes municipios de Galicia e Norte de Portugal integrantes do Eixo Atlántico, para compartir experiencias entre escolares. Está dirixido ao alumnado de 5º e 6º curso de educación primaria de centros públicos do Concello da Coruña, cun máximo de 30 participantes (incluídos 2 docentes).

Os Concellos da Coruña e Guimarães, que nesta ocasión resultou emparellado coa Coruña tras o sorteo realizado o pasado mes de decembro, faranse cargo de todos os gastos (desprazamentos, aloxamento e manutención, seguros de viaxe e responsabilidade civil e acompañamento), así como do apoio na organización de visitas e itinerarios polas súas respectivas cidades.