A cuarta edición da carreira 10K Costa Ártabra reuniu esta mañá preto de 2.000 persoas nunha xornada deportiva e solidaria que volveu unir os castelos de Santa Cruz, en Oleiros, e San Antón, na Coruña.

O concelleiro de Deportes, Manuel Vázquez, participou no desenvolvemento da proba, na que destacou "a gran resposta da cidadanía nun evento que combina a práctica deportiva cun claro fin social". Neste sentido, puxo en valor o papel destas iniciativas "na promoción de hábitos saudables e na construción dunha cidade máis inclusiva".

A carreira arrancou ás 9.30 horas desde a rúa Carlos Manuel de Cépedes, en Santa Cruz, e completou un percorrido de dez quilómetros polo litoral ata a meta situada no Parrote, nun trazado a nivel do mar que percorreu enclaves como Santa Cristina e A Pasaxe.

A cita mantivo o seu carácter benéfico, destinando os fondos recadados á Asociación CASCO para apoiar o seu programa de deporte inclusivo e contribuír á unidade de VIH do CHUAC. Ademais, habilitouse un dorsal solidario que permitiu a colaboración da cidadanía máis alá da participación na carreira.

En liña co compromiso do Goberno de Inés Rey co impulso do deporte e as iniciativas de carácter social, a proba consolidouse como unha das citas destacadas do calendario deportivo da área metropolitana.

No apartado deportivo, os gañadores absolutos foron Carmen Lozano López e Abdelaziz Fatihi. Tamén se entregaron premios ás diferentes categorías, tanto masculinas como femininas.

A organización, a cargo do Comité Cidadán Antisida da Coruña (CASCO) e BOXFIT, dispuxo diversos servizos para as persoas participantes, como transporte ata a saída, gardaría, avituallamento, asistencia médica e servizo de fisioterapia na meta.

Esta cuarta edición incluíu tamén unha homenaxe ao atleta olímpico coruñés Andrés Díaz, en recoñecemento á súa traxectoria deportiva internacional.