A Coruña recibe o mes de abril coa gastronomía e o humor como os pratos fortes da primavera. O Galicia Fórum Gastronómico, o Encontro Mundial de Humorismo (EMHU) e concertos de artistas internacionais como Los Tigres del Norte ou Sergio Dalma dan boa mostra da cultura de vivir da cidade herculina que, de novo, volve consolidarse como unha das urbes españolas con máis proxección cultural durante este mes.

A nivel culinario, destaca o Galicia Fórum Gastronómico. Este encontro indispensable para profesionais do mundo da gastronomía terá lugar no EXPOCoruña do 7 ao 9 de abril e volverá situar a cidade como un referente da cociña atlántica a nivel nacional.

Os mellores humoristas do país danse citan na Coruña

Grandes figuras do humor e a comunicación como Silvia Abril, Antonio Resines, Juan Herrera, Eva Hache, Carolina Iglesias, Luís Piedrahita, Henar Álvarez, Galder Varas ou Leo Harlem, entre outras, visitarán este mes a cidade da Coruña dentro do Encontro Mundial de Humorismo.

A cuarta edición dun dos eventos humorísticos máis importantes do noso país terá lugar do 25 de abril ao 5 de maio en diversas localizacións da cidade como o Coliseum, PALEXCO, o teatro Colón, o Palacio da Ópera, a sede Afundación e a libraría Santos Ochoa.

Los Tigres del Norte, Sergio Dalma ou Pablo López en concerto

A Coruña segue afianzándose como a cidade perfecta para acoller importantes eventos musicais. Proba diso son algúns dos concertos que están programados para este mes de abril en diferentes instalacións da urbe.

A música norteña de Los Tigres del Norte encherá o Coliseum o venres 5. A actuación da mítica agrupación mexicana, gañadora de varios premios Grammy e Grammy Latino, dará a saída a grandes concertos como o de Pablo López (6), Sergio Dalma (20) ou Mikel Izal (21) no Palacio da Ópera. ABHIR, Hard GZ ou Xabier Díaz & Adufeiras de Salitre completan a programación musical para as próximas semanas.

E, por suposto, tampouco faltarán oportunidades para gozar da Orquestra Sinfónica de Galicia no Palacio da Ópera. Dima Slobodeniuouk, Claire Booth ou Juan Ferrer son algúns dos músicos que achegarán o seu talento á cidade herculina.

Último adeus a Helmut Newton

A Coruña despedirá o próximo 1 de maio a exposición Helmut Newton: Fact&Fiction, unha iniciativa artística que xira ao redor da vida e obra do que foi considerado un dos fotógrafos máis importantes do mundo. A mostra desembarcou no Peirao de Batería coruñés o pasado mes de novembro grazas á Fundación Marta Ortega Pérez (Fundación MOP).

A selección de fotografías que se mostran ao público inclúe os seus icónicos "grandes espidos" e os inesquecibles retratos de personaxes excepcionais como Karl Lagerfeld, Yves Saint Laurent, Andy Warhol, Elsa Peretti, David Bowie, Daryl Hannah, Jerry Hall ou Naomi Campbell.

Con esta exposición, a cidade volve consolidarse como un referente á hora de albergar mostras de arte a nivel internacional congregando, no propio centro MOP, a modelos, fotógrafos, personaxes do mundo do espectáculo ou mesmo a importantes políticos ao redor da cultura.