O Concello da Coruña organiza unha nova edición de A Festa das Letras, que se celebrará do xoves 14 ao domingo 17 de maio de 2026, cunha programación que converterá distintos espazos da cidade nun gran escenario para a celebración da lingua e da creación cultural galega.

"Durante catro xornadas, A Coruña reafírmase como un dos grandes epicentros culturais do país cun programa diverso e gratuíto que inclúe concertos, espectáculos familiares, música tradicional, encontros e artes escénicas, da man de artistas e colectivos de referencia da escena galega actual, xunto cunha ampla presenza de creadoras e creadores locais", indicou Inés Rey, alcaldesa da Coruña, durante a presentación da programación, que tivo lugar en María Pita e na que estiveron presentes representantes das distintas asociacións culturais da cidade. A rexedora estivo acompañada polo concelleiro de Cultura e Turismo, Gonzalo Castro.

A programación destaca por contar con grandes referentes da música en galego como Ailá, MJ Pérez, 9Louro, Dakídarría ou Orquestra Bravú Xangai. Ademais, haberá tamén actuacións para o público infantil e actuacións musicais das asociacións coruñesas nos xardíns de Méndez Núñez. A segunda edición da Festa das Letras desenvolverase en espazos emblemáticos como o Campo da Leña, a praza de Azcárraga, os xardíns de Méndez Núñez, o Teatro Rosalía de Castro, o Teatro Colón e o Centro Ágora, conectando prazas, teatros e rúas a través dunha programación común que ten na lingua galega o seu eixo central.

O programa inclúe actuacións musicais de estilos diversos, propostas para público infantil e familiar, foliada tradicional, encontros con artistas e espectáculos escénicos, co obxectivo de achegar a celebración das Letras Galegas a todos os públicos e de poñer en valor a vitalidade da creación cultural en galego. A Festa das Letras consolídase así como unha cita destacada do calendario cultural da cidade, reforzando o compromiso do Concello coa promoción da lingua galega, co apoio ao tecido cultural e coa ocupación do espazo público como lugar de encontro arredor da cultura.

AgoraSón e A Coruña das Letras completan a programación

Este mes de maio tamén se celebrarán outros eventos vinculados á lingua que completan aprogramación das Letras Galegas do Concello da Coruña. Por unha banda, este sábado comezan as andainas guiadas A Coruña das Letras, con Xurxo Souto. A primeira actividade leva por título 'A ruta de Ulises Fingal, as pedras percebeiras da contorna da Torre de Hércules'. A segunda chámase 'Na procura do antigo Gremio de Mareantes' e celebrarase o 30 de maio, mentres que a derradeira sesión leva por nome 'O ascenso á Pena da Vixía' e será o 6 de xuño. As inscricións faranse a través do correo inscricionslingua@coruna.gal dende o luns anterior a cada unha das andainas, ata que se esgoten as prazas (55).

Ademais, o venres que vén celebrarase unha nova edición de AgoraSón Primavera con concerto de Ialma. As invitacións para asistir á actuación só se poden conseguir nas Bibliotecas Municipais da Coruña ao retirar material, tanto de lectura como audiovisual, en lingua galega.