O Coro da Orquestra Sinfónica de Galicia e a Orquestra Xove da Sinfónica de Galicia viaxarán esta semana a Andorra para participar na interpretación de Carmina Burana, de Carl Orff, dentro da programación de ClàssicAnd 2026, o festival internacional que se celebra no Principado de Andorra. "Este é un fito histórico para a Orquestra Sinfónica de Galicia e para A Coruña, porque leva por primeira vez o talento das nosas formacións a Andorra e proxecta internacionalmente a excelencia cultural da nosa cidade", indicou Inés Rey, alcaldesa da Coruña.

O concerto terá lugar o sábado 30 de maio ás 20.30 horas no Parc Central de Andorra a Vella, e reunirá no escenario a ONCA - Orquestra Nacional Clásica de Andorra, a Orquestra Xove da Sinfónica de Galicia, o Coro da OSG e o Coro Infantil Amics de la Unió de Granollers, baixo a dirección musical de Josep Caballé Domenech.

A participación neste proxecto supón un fito para a OSG, xa que será a primeira vez que formacións vinculadas á institución actúen en Andorra. Para esta produción desprazaranse desde Galicia máis dun cento de persoas, entre integrantes do Coro da OSG, músicos da Orquestra Xove e equipo técnico e artístico.

A cita ten ademais un especial valor artístico e formativo, ao reunir novamente sobre o escenario os músicos novos da Orquestra Xove da Sinfónica de Galicia co Coro da OSG, unha formación estable cunha ampla traxectoria no repertorio sinfónico-coral. Esta colaboración entre xeracións reflicte unha das liñas fundamentais de traballo da OSG: a transmisión de experiencia, o acompañamento do talento novo e a creación de proxectos artísticos de gran formato.

Carmina Burana, unha das obras máis populares e impactantes do repertorio do século XX, combina a forza da orquestra, a potencia do coro e a teatralidade da palabra cantada. O seu célebre inicio, O Fortuna, converteuna nunha partitura recoñecible para públicos moi diversos, pero a obra completa ofrece un percorrido de enorme enerxía rítmica e expresiva.

A presenza do Coro da OSG e da Orquestra Xove en ClàssicAnd reforza a proxección exterior da Sinfónica de Galicia e sitúaa nun contexto internacional de colaboración con outras institucións musicais. Tras os recentes proxectos desenvolvidos en Galicia, esta actuación en Andorra abre unha nova oportunidade para mostrar o traballo das agrupacións vinculadas á OSG fóra do seu territorio habitual.