A alcaldesa, Inés Rey, presidiu esta mañá a xunta do Consorcio para a Promoción da Música, que aprobou o calendario coa programación de actuacións prevista ata finais de ano, e que arrincará co concerto da Orquestra Sinfónica de Galicia (OSG) que terá lugar o 23 de agosto en María Pita, durante a Semana Clásica.

O director titular da OSG, Roberto González-Monjas, levará a batuta da orquestra nunha actuación na que se versionarán bandas sonoras de grandes clásicos do cinema, como A lista de Schindler, Memorias dunha geisha, ET ou Superman, entre outros. Todas elas, dun prestixioso compositor como o estadounidense John Williams, protagonista deste concerto-homenaxe.

Será o punto de partida dun último cuatrimestre cheo de propostas culturais que tamén inclúen a Programación Lírica de Amigos de la Ópera. Destaca a doble sesión de 'Carmen' que acollerá o Palacio da Ópera os días 5 e 7 de setembro, co gallo do 150 aniversaio da ópera de Georges Bizet, cunna impactante producción dirigida por Calixto Bieito. Amigos de la Ópera presentará unha montaxe que reunirá a máis dun cento de artistas en escea, acompañados pola OSG baixo a dirección de Gianluca Martinenghi.

O calendario da Programación Lírica terá continuidade no Teatro Colón ata finais de ano, con actuacións centradas en figuras como Mozart e Debussy e a participación do coro da Orquestra Gaos e Fernando Briones.

Ademais, tamén ata finais de decembro, a Orquestra Sinfónica de Galicia avanzará co seu calendario de actuacións para o programa de abonados, con concertos nos que haberá directores convidados como Dima Slobodeniouk, Lucas Macías ou Eva Ollikainen, entre moitos outros. 

O peche da programación deste ano será, como sempre, no contexto do Nadal. O 19 de decembro, no Palacio da Ópera, Roberto González-Monjas, acompañado polo Coro Xove e o Coro de Nenos da Sinfónica de Galicia, así como por Daniel Artés e Sofía Rodríguez, ofrecerá o clásico concerto de Nadal da OSG, na que se versionarán pezas de Mozart, Bizet, Rossini e John Williams, todas elas dunha temática festiva ou inspiradas en longametraxes propias das datas.