A primeira xornada da tradicional Romaría de Santa Margarida pechou onte cunha alta participación. A apertura da romaría, que se estenderá ao longo de toda a fin de semana, arrincou co espectáculo de PÄRBO, o proxecto formado por Begoña Riobó e Anxo Pintos, acompañado polas creacións visuais de Montse Piñeiro no Planetario da Casa das Ciencias. Xa pola noite, preto de 2.000 persoas asistiron no anfiteatro á Gran Noite do Folclore, converténdoa na máis concorrida da historia da Romaría de Santa Margarida. A cita contou coa participación de Son d'Aquí, Donaire, Xacarandaina e Cántigas da Terra.

"O inicio da Romaría deste ano foi fantástico. Demostrou que o interese da cidadanía nas actividades culturais e nas expresións artísticas populares é agora máis forte que nunca. A Coruña é unha cidade orgullosa da súa historia, do seu folclore e do seu talento local. Unha vez máis o demostramos, e imos seguir a demostralo durante as dúas xornadas que restan", valorou o concelleiro de Cultura e Turismo, Gonzalo Castro, que estivo hoxe no parque visitando os postos e as actividades. 

A de hoxe é a xornada máis participativa, cun espazo de obradoiros, mostra de entidades e artesanía musical na explanada da Casa das Ciencias. A programación musical contará coa actuación de Benofán, o pasarrúas da Real Banda de Cadeiras Encartables e os concertos de Unto Vello, Os Viqueiras e Alana. 

A romaría rematará o domingo cun programa que combinará tradición e novas expresións musicais. A Banda Municipal de Música da Coruña actuará xunto a Donaire, mentres que ao longo da xornada pasarán polos escenarios Pansenfron, Son Galaico, Herbamora, Mondra e o grupo irlandés Dervish, unha das formacións de música celta máis recoñecidas a nivel internacional.

A Romaría de Santa Margarida consolídase así como unha das grandes celebracións da cultura tradicional galega e unha das propostas máis singulares do calendario estival da cidade, reunindo cada ano a milleiros de persoas arredor da música, da artesanía e do patrimonio cultural compartido.

PROGRAMACIÓN RESTANTE

Sábado, 29 de agosto

• 11.30 a 14.30 h - Explanada da Casa das Ciencias - Espazo participativo: 
  • Obradoiros para distintos niveis e idades
  • Mostra de entidades da cidade
  • Mostra de artesanía musical
• 13.30 h - Explanada da Casa das Ciencias - Actuación de Benofán 
• 16.00 a 19.00 h - Explanada da Casa das Ciencias - Espazo participativo:
  • Obradoiros para distintos niveis e idades
  • Mostra de entidades da cidade
  • Mostra de artesanía musical
• 19.30 h - Explanada da Casa das Ciencias - Actuación de Real Banda de Cadeiras Encartables. 
• 20.30 h - Anfiteatro de Santa Margarida - Concertos de Unto Vello, Os Viqueiras e Alana.

Domingo, 30 de agosto

• 12.00 h - Escalinata da Casa das Ciencias - Concerto da Banda Municipal de Música da Coruña con Donaire 
• 13.00 h - Escenario das merendas - Concerto de Pansenfron
• 17.30 h - Escenario das merendas - Concerto de Son Galaico
• 20.00 h - Anfiteatro de Santa Margarida - Concertos de Dervish, Herbamora e Mondra