A Coruña vivirá unha das fins de semana máis intensas do verán en canto a festividades de barrio, con celebracións en Feáns, Monelos, Peruleiro-Mariñeiros, Os Castros, O Portiño e As Xubias. As diferentes programacións, impulsadas a través do programa de subvencións de Festas nos Barrios e promovidas polo tecido veciñal, converterán os barrios en espazos de encontro e convivencia, con actividades culturais, música en directo, gastronomía popular e propostas para todas as idades.

"O Goberno de Inés Rey continúa a reforzar o apoio ás entidades veciñais a través do programa de Festas nos Barrios, unha iniciativa que contribúe a dinamizar a vida comunitaria e a preservar as tradicións locais", indicou Gonzalo Castro, concelleiro de Cultura e Turismo.

Feáns celebra as súas festas na honra da Virxe do Carme

As festas de Feáns desenvolveranse entre o venres 17 e o domingo 19 de xullo cun amplo programa musical e festivo. A cita arrancará o venres coa actuación de Hugo Mosquera e a verbena coa orquestra Cinema. O sábado contará coa participación dos Viqueiras de Ordes, unha sesión vermú amenizada pola orquestra Los Key, actuacións de DJ Javito, Paco Pakolas, a Tuna de Veteranos da Coruña e unha gran verbena nocturna coa propia orquestra Los Key. O domingo haberá música tradicional con Aturuxo e a charanga Sorcha, ademais das actuacións da orquestra Travesía e dunha sesión musical de DJ Javito para pechar tres días de celebración.

Monelos celebra a súa gran festa popular

A chaira de Salvador de Madariaga acollerá o sábado 18 unha nova edición das festas de Monelos, cunha programación centrada na participación veciñal e familiar. A xornada comezará cun pasarrúas dos Gaiteiriños e de Birloque Gaiteiros, seguido do pregón a cargo de Ángeles Huerta, directora de 'Esquece Monelos'. Durante o día haberá inchables e festa da escuma para a cativada, ademais das actuacións de Nuevo Plan, Amizades, Nós Brigantium, os grupos tradicionais participantes no pasarrúas e a formación Son de Camagüey, encargada de pechar a xornada festiva.

Peruleiro-Mariñeiros volverán homenaxear o seu carácter mariñeiro

As festas do Carmen de Peruleiro e Os Mariñeiros celebraranse do 17 ao 19 de xullo cun programa que mestura música, tradición e actividades infantís. A inauguración terá lugar o venres, seguida da actuación de Begoña García e dunha sesión musical con DJ Javito. O sábado incluirá unha chocolatada popular, contacontos en galego, actividades infantís, festa da escuma, sesións de DJ e a actuación do Grupo Miami. Xa o domingo, a programación contará con pasarrúas de Contiños da Feira, sesión vermú co grupo Gremlins Pop Rock, actuación da Nova Trova Coruñesa e o concerto de The Muppets, ademais dun mercado de artesanía durante toda a fin de semana.

A Romaría dos Castros ofrecerá tres días de música tradicional e convivencia

O Parque de San Diego será o escenario da Romaría dos Castros, que se celebrará entre o 17 e o 19 de xullo e que se consolida como unha das grandes citas do verán nos barrios coruñeses. A programación incluirá o pregón de Maika e Willy Sieiro Vázquez, fillos de Víctor Sieiro, así como actuacións de Xurxo Fernandes, Tres Pesos, Contiños da Feira, Acordeireta, Luar na Lubre, Orquestra Pantasma, Pan Sen Fron, DJ Misa e os grupos tradicionais participantes nos pasarrúas e alboradas. Tamén haberá xantares populares e xogos tradicionais para toda a familia.

As Xubias celebran o Carme con gastronomía, música e tradición mariñeira

As festas do Carmen de As Xubias arrancarán o sábado 18 cun pregón sorpresa, seguido dunha sesión vermú amenizada por El Corta. A gastronomía será unha das grandes protagonistas, con concurso de tortillas, degustación de polbo, unha gran churrascada popular e diferentes propostas culinarias ao longo da fin de semana. A programación incluirá tamén unha procura do tesouro para a cativada, xogos populares, actuacións da asociación Eidos, concertos de Folkolicos e Kafé de Pota, sesións de DJ e fogos artificiais. O domingo celebrarase ademais a tradicional procesión marítima da Virxe do Carme, unha das citas máis singulares destas festas, xunto cunha degustación popular de fideuá e diferentes actividades lúdicas. Tamén actuará a Asociación Cultural Folerpas ás 14.00 horas.

O Portiño honra a Virxe do Carme cunha celebración ligada á tradición mariñeira

O barrio do Portiño celebrará o domingo 19 de xullo as súas festas do Carmen cunha programación que pon en valor a identidade mariñeira da zona. A xornada comezará cunha sesión vermú no porto do Portiño amenizada polo dúo José Brea & Miguelón, acompañada dunha comida popular con churrasco e fideuá. Pola tarde terá lugar a misa na honra da Virxe do Carmen na igrexa parroquial de San Pedro de Visma, coa participación da Coral Polifónica El Eco, seguida dunha procesión ata o porto acompañada polo grupo de gaitas Emilia Pardo Bazán. A celebración continuará coa tradicional procesión marítima, unha ofrenda floral e unha exhibición de bombas de palenque. Como peche da xornada festiva, a veciñanza poderá participar nunha romaría popular con sardiñada e churrasco amenizada polo Dúo Miami.

"Estas celebracións son unha mostra do dinamismo do movemento veciñal coruñés e da importancia que teñen os barrios na construción dunha cidade viva, participativa e cohesionada", destacou o concelleiro de Cultura e Turismo, Gonzalo Castro. Ao longo da fin de semana, milleiros de persoas poderán gozar dunha programación diversa que combina tradición, cultura popular e convivencia cidadá.